CAMELIAS MASCOTAS

Papo’s xa é maior

Publicado o por

A emblemática bocatería da rúa Venezuela afronta unha nova etapa cando acaba de cumprir 40 anos. Da man de Óscar, fillo dos fundadores, o negocio acaba de vivir un cambio sen precedentes, ampliando e modernizando o seu local e a súa carta.

No verán de 1982, José Amoedo e Lourdes Lusquiños montaron unha bocatería nun diminuto local da rúa de Venezuela. Fixérono nun momento en que os bocadillos estaban de moda e destacaron en imaxinación ao crear emparedados con ata dez ingredientes, algo insólito daquela. Á improvisación da cociñeira debemos mitos da gastronomía viguesa, como o bocata Especial Lourdes, obxecto de peregrinación nado coa intención de saciar a un cliente lambón, o Súper Lomo ou o Maceió. Axiña o negocio colleu sona e decidiron abrir tamén de madrugada, aproveitando o auxe da movida dos oitenta. «Abrían ata as cinco da mañá ou ata que se acabase o pan», lembra Óscar, un dos fillos da parella, que pensa que o éxito do local queda patente no eclecticismo da clientela. «Era o único lugar de Vigo no que se xuntaban pijos, punkys e rockabillies», afirma cun sorriso.

REVISTA NOVEMBRO
Lourdes e José

Óscar Amoedo Lusquiños é unha voz máis que autorizada, pois acaba de poñerse á fronte desta entidade trala xubilación de seu pai. Non foi unha decisión improvisada; elixiu a carreira de Empresariais coa ilusión de empregar os coñecementos en facer medrar o negocio familiar. A crise atrasou esta meta, pero Lusco, como tamén é coñecido o actual xerente, tiña claro que non quería «que unha marca tan ben consolidada como Papo’s» se acabase perdendo, e decidiu tomar as rendas unha vez se xubilaron os pais.

Óscar (segundo pola esquerda), rodeado dos seus pais e xunto ao equipo do Papo’s na inauguración do novo local

Recentemente, a empresa viviu varios cambios. Pechou os locais que a cadea tiña no Centro Comercial Gran Vía, na Cidade Universitaria, e na Ramallosa, e abriu un novo a pé de praia en Panxón (Nigrán), no que habitualmente hai música en directo. Este verán pasado, o emblemático local da rúa de Venezuela fixo 40 anos e celebrouno cun cambio de carácter histórico: o que foi descrito como o negocio máis rendible de Galicia, por concentrar gran cantidade de clientela en 22 metros cadrados, mudouse a un local amplo con terraza e unha sala interior cunha ducia de mesas e no que hai sitio ata para pendurar unha moto da parede. O novo local está a uns vinte metros do que ocupou durante catro décadas e nel tamén hai espazo para a nostalxia: ademais de fotografías e cadros, o novo emprazamento conta cunha esquina que recrea o Papo’s orixinal: pequena, con barras altas e pensada para coller para levar.

O clásico bocadillo Lourdes

Na carta tamén atopamos sorpresas, pois no antigo local non sobraba espazo nin para fritir unhas patacas. Entrantes como aros de cebola, tequeños ou tiras de polo; ensaladas contundentes, hamburguesas gourmet e opcións veganas son algunhas das novidades. Os bocatas míticos seguen aquí, cun engadido especial chamado Pepe 1950, pois Óscar quería que, coma súa nai, seu pai tamén lle dese nome a un entrepán. Aínda que xubilado, é habitual que o creador ande polo local. «Quixen manter a esencia familiar e os produtos que nos fan ser quen somos, dentro dun concepto atractivo para a miña xeración», conclúe o fillo.

Rúa de Venezuela, 10
986 47 03 47
@bocateriapapos

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.