Quen somos
Falamos da movida viguesa coa nostalxia dun tempo pasado no que a cidade olívica foi escenario dun movemento cidadán, cultural e musical moi activo, que tivo conexión coa movida madrileña. Velaí o dito “Madrid escríbese con V de Vigo”. É momento de rachar con esa morriña, porque en Vigo estase a mover algo. As opcións para pasar o tempo de lecer son cada vez máis numerosas e variadas e os vigueses estamos ávidos de participar delas.
Demostrámolo acotío enchendo a rúa en eventos como a Reconquista, O Marisquiño ou os concertos de Castrelos.
Fotos de Fernando Laconde, Alba sotelo e Tamara Novoa.
A Movida chega para informar de tódolos eventos que teñen lugar na cidade. Dos meirandes acontecementos a aqueloutros que adoitan pasar desapercibidos. Eventos para menear o corpo en concertos e festas, para se poñer ao día en charlas e coloquios ou para pasalo xenial cos máis pequenos en espectáculos e obradoiros familiares. Tamén haberá lugar para propostas gastronómicas e plans para estar en boa forma como andainas, carreiras populares e rastrexos.
Para iso, no apartado Axenda do noso web atópase unha completa relación de todo o que se está a mover en Vigo no día e hora á escolla. E, se aínda houbese dúbidas sobre que plan da oferta escoller, no apartado Amovigo atópanse artigos e entrevistas con máis información sobre os eventos. Ademais, os subscritores do noso Newsletter recibirán todos os xoves un relatorio dos mellores plans da semana no seu enderezo electrónico.
Detrás d’A Movida está un grupo de viguesas vencelladas ao amor pola nosa cidade. Sabemos que Vigo ten o potencial e que os vigueses temos a actitude precisa para lle devolver á cidade o título de Capital da Movida!
O equipo
Xornalista por vocación. Marchou a Londres estudar un master en Xornalismo Internacional e tras traballar varios anos en Barcelona nunha Asociación sen ánimo de lucro, decide volver ao seu Vigo natal. Na actualidade é unha das creadoras deste proxecto. O que lle permite desenvolver unha das tarefas polas que sinte maior paixón: contar historias relacionadas coa cultura e a movida da súa ben querida cidade olívica.
Licenciada en Comunicación Audiovisual e cun afán de contar historias fixo un máster en guión audiovisual. Os derroteiros da vida a levaron a traballar no mundo da web e no deseño gráfico no que agora dedica case o 100% do seu tempo. Pero sempre sen deixar de lado a súa paixón por contar historias, xa sexa con lapis e papel ou cunha cámara polas rúas do seu querido Vigo.
Creativo ao cadrado, Rubén González (Vigo, 1982) é Licenciado en Publicidade e Relacións Publicas pola Universidade de Vigo. Leva quince anos entre illustrators e indesigns. Pasou por axencias de publicidade e por editoriais nacionais. Como emprendedor, é un dos responsables de Ultramarinos Deseño Galego -marca que quere reinventar o concepto de souvenir-, actividade que compaxina co seu traballo como publicista freelance. Ah! Tamén é o responsable do deseño da revista A Movida.
Uxío é Técnico Superior en Produción de Audiovisuais e Espectáculos e Especialista en dobraxe pola Universidade de Vigo, onde cursou o Grao en Estudos de Galego e Español. Actor de dobraxe con máis de dez anos de experiencia, participou en producións tan coñecidas como Astérix: A residencia dos deuses ou Harry Potter e tamén levou a cabo diferentes actividades para produtoras de cinema, radio, televisión e vídeo.
Habitual da Facultade de Filoloxía e Traducción da Universidade de Vigo, formou parte da Área de Normalización Lingüística, e ten colaborado activamente en iniciativas do centro.
Amante das historias e do medio audiovisual para transmitilas. Viaxeira incansable, sempre cámara en mán. Apaixonada da imaxe en toda forma e aspecto. Graduada en comunicación e especializada en xeración de contido audiovisual, na actualidade traballa como fotógrafa e videógrafa freelance.
Fotógrafa de vocación e poeta de corazón, combina a súa paixón pola fotografía coa de narrar historias. Profesional multidisciplinar ou “todoterreno” cuxa máxima aspiración é poder traballar en cine, especialmente no campo do guión e a montaxe. Licenciada en Comunicación Audiovisual e cun Máster en Contidos Audiovisuais, ambos da Universidad de Vigo, traballou como guionista, cámara, montadora e fotoxornalista para diversos entes e productoras.
É graduado en lingua e literatura española pola Universidade de Santiago de Compostela. Actualmente cursa un máster dedicado a formación e investigación literaria e teatral no contexto europeo na UNED. Ten coñececementos de varias linguas, participa e dirixe iniciativas culturais, colabora con distintas editoriais e participa en xurados de premios literarios. Na súa bitácora persoal Palabra de Gatsby exerce a crítica literaria e teatral. Un proxecto en continua revisión coa intención de amosar o seu amor polas letras.
Licenciada en xornalismo e literatura comparada, adora ler, escribir, o cine, a praia e por suposto, gozar da oferta cultural de Vigo. Traballa como redactora e community manager freelance, e é co-fundadora de medios como Librópatas, Disquecool ou MuebleSueco.
Juan Teixeira é un fotógrafo documental con sede en Vigo. Cursou estudos de Publicidade e RRPP, pero pronto se decatou de que aquel non era o seu lugar. A través dunha serie de viaxes por Sudamérica e o sueste asiático, observou que a fotografía era unha forma de relacionarse e explorar o mundo dun modo moi persoal, coma un espectador que intenta comprender o que sucede ao seu redor. Desde entón intenta comprender ese mundo que o rodea, centrándose nas persoas e as súas relacións con outras persoas, coa sociedade, a natureza e o tempo e o lugar que a cada unha lles toca vivir.
Estela naceu no 92 (o ano de Cobi) preto do mar. É filóloga e correctora literaria, cirurxiá de textos, amiga das redes sociais e ten un interese case innato pola moda e a cultura. Estela é aprendiza de todo e especialista en nada, ten incontinencia verbal crónica, e, grazas á mellor das sortes, as palabras danlle de comer.
Desde 2014 Carnotto é fotoxornalista freelance e traballa para diferentes publicacións. O seu traballo publicouse en The Guardian, Der Siegel, Financial Times, Vice Magazine, El País. No 2017, gaña a “Imagem do ano” no prestixioso concurso Estaçao-Imagen de Portugal. No mesmo ano gaña o Galicia en Foco, o premio fotoxornalístico máis antigo de Galicia promovido polo Clube de prensa de Ferrol. O seu traballo sobre os migrantes forma parte dun libro publicado en 2016 baixo o nome A ruta dos refuxiados
A Marta gústalle dicir que é mais viguesa que o olivo. Esta publicista dedicada profesionalmente á comunicación dixital, presume de ter dúas paixóns: Vigo e contar historias. Así que mentres axuda a outros cos seus textos e as súas redes sociais, decidiu que o seu obxectivo vital sería amosar que Vigo non é una cidade tan fea como algúns se emperran en afirmar. E iso é o que fai desde Me como Vigo.