Cerámica con nome de muller

Cuncos, macetas, pratos, xogos de café, xoias… Pezas cheas de maxia partindo do debuxo. A man que moldea a arxila ata facela chegar a estas formas inimaxinables é a de Nero, unha artesá nada en Vigo e con formación en Belas Artes. Durante os seus días na Escola de Artes e Oficios, grazas á liberdade infundada polos seus mestres, xurdiu Peixe Nero: un selo cheo de identidade que dá resposta ás inquedanzas creativas desta artista, que nos ofrece arte en cerámica feita á man achegando aos nosos fogares obxectos útiles dotados da beleza necesaria para habitar en espazos cheos de vida.

A filosofía de Peixe Nero é a de ofrecer a artesanía que poida ser empregada no día a día a través de obxectos creados con agarimo e consciencia. No seu imaxinario, Peixe Nero fai unha chamada á natureza mediante formas de animais, cores e elementos dos océanos, flores, plantas… Por outra banda e, dun xeito aínda máis particular, Nero amósanos o corpo humano e as liñas que conforman os recunchos da carne con imaxes sensuais, ambiguas e ardentes.

Neste ritual no que a terra se volve pedra e os diversos elementos da natureza dan pé a cristais, xogos de cores e texturas diversas. Atopamos abelorios con forma de mans, aneis con labios que bican, ollos que todo o ven, vaixela adornada con peixes, paxaros, corpos femininos espidos e pequenos amuletos que levar sempre connosco. Para coñecer estas pezas e moitas máis debemos visitar o Espazo Balea, un obradoiro situado en Candeán e formado por varias artesás e amantes do feito á man e a combinación de saberes, un lugar aberto no que a xente é benvida. Alí pódese mercar, asistir a talleres programados ou idear e facer encargos. Tamén podemos encontrar as marabillas de Peixe Nero en Bazares nos Bares, no Mercado de Arte do Calvario ou no Mercado da Reconquista. E sempre ei internet, entrando na bitácora peixenero.blogspot.com ou en redes sociais buscando por @peixenerocerámica.

The following two tabs change content below.

• Bio
• Últimos posts

Estela Gómez

Estela naceu no 1992 preto do mar. É filóloga, escritora e correctora literaria, amiga do analóxico, a cultura e a moda vintage. No 2021 foi unha das dez escritoras seleccionadas da Residencia Literaria da Cidade da Cultura dirixida por Javier Peña. No 2025 publicou a súa primeira novela. Poderás atopar a Estela na biblioteca, no cine, no museo, no teatro, nun concerto ou no centro da cidade lendo un libro ao sol.

Últimos posts de Estela Gómez (ver todos)

• Tikismikis: cerámica con esmero - 13 Marzo, 2025
• Norat crochet, na cabeza coas mans - 21 Febreiro, 2025
• Volve escribir a man con Panda Bohème - 18 Decembro, 2024
• Nove ideas de regalo local - 5 Decembro, 2024
• Triqueta Editora, pequenos grandes lectores - 7 Novembro, 2024