Son un toxo: orgullo bravo
Hai uns anos, Rebeca Domínguez comezou a publicar en redes sociais as súas creacións en forma de ilustracións persoais e viñetas con frases e retranca en galego. Ao pouco tempo, os seguidores comezaron a pedirlle camisetas e outros produtos con esas ilustracións e viñetas, así que Rebeca decidiu botarse á auga, dar resposta a esas peticións e crear a marca téxtil Son un toxo.
Así naceu este proxecto, que, coa axuda da xente, foi crecendo: quen compraba a camiseta compartía tamén como lle quedaba e, dese modo, os seguidores foron subindo e a demanda de produtos foi medrando. No 2022 Rebeca lanzou, en colaboración con ClickAge (axencia de márketing na que traballaba) a web sonuntoxo.com, a través da cal vende directamente todos os seus produtos. Desde o inicio, o lema de Son un toxo é: «Sentimos amor pola nosa lingua, falámola e vestímola», co obxectivo de transformar o orgullo de pertencer á nosa cultura, de promover a nosa lingua e de facer que estea presente na xente, nas rúas e nos comercios a través de camisetas, suadoiros, bolsas, cuncas, tarxetas, chaveiros, cadernos, fundas para teléfono, termos, gorros…
Grazas a esta filosofía de marca xurdiron colaboracións diversas, como coa marca de fundas para móbiles Karkasa, con empresas de acendedores e con outras tendas externas. Ademais, a marca conseguiu medrar máis grazas á axuda de influencers de Galicia como Tania Veiras, Fátima Pego ou Gabi García, entre outros.
Agora que a primavera e o verán xa están tan preto, nós optamos por una colección que arrasa: «Verbena», perfecta para as persoas máis atrevidas, chea de cores rechamantes, e tamén ideal para as máis trouleiras. Se non temos o corpo para moita festa e somos máis de natureza, recomendamos a colección «Somos de Norte», ideal para os amantes da costa, ou «Un solpor en Galicia», para gozar da fin do día en boa compañía. Por suposto, a clásica camiseta ou suadoiro «Son un toxo» é un must no armario dos máis bravos.
@sonuntoxoemais | www.sonuntoxo.com
Estela Gómez
Correctora literaria e redactora de contidos
Estela Gómez
Últimos posts de Estela Gómez (ver todos)
- Son un toxo: orgullo bravo - 20 Maio, 2025
- Sen bolsa, por favor - 18 Abril, 2025
- Tikismikis: cerámica con esmero - 13 Marzo, 2025
- Norat crochet, na cabeza coas mans - 21 Febreiro, 2025
- Volve escribir a man con Panda Bohème - 18 Decembro, 2024