CAMELIAS MASCOTAS

Chega o Netflix galego: a TVG e o Xabarín Club estrean plataforma dixital

Publicado o por

A Televisión de Galicia adáptase aos novos tempos con AGalega, unha plataforma de vídeo baixo demanda similar as populares Netflix, HBO Max ou Filmin. Neste novo espazo virtual atopamos máis de 1400 contidos audiovisuais entre filmes, series, curtametraxes, programas de televisión, concertos e podcasts. O famoso Xabarín Club tamén goza dunha nova plataforma grazas ao traballo da Mesa pola Normalización Lingüística e as 33.000 sinaturas que acadaron ao longo de tres anos.

Do mesmo xeito que acontece co tren de alta velocidade, parece que en Galicia os avances tecnolóxicos sempre tardan un pouco máis en chegar. Este mércores presentouse AGalega, unha plataforma de vídeo dixital impulsada pola Televisión de Galicia que recompila máis de 1400 contidos entre filmes, series, curtametraxes, programas de televisión, concertos e podcasts. Podemos acceder de balde a todo este catálogo a través de agalega.gal ou descargando a app en Google Play e App Store ou descargándoa nos televisores intelixentes Fire TV, LG e Samsung.

Como é habitual neste tipo de plataformas baixo demanda, AGalega contará con contido feito expresamente para esta canle dixital: Na Gloria, de Xosé Touriñán e Dani Rovira; e Ghuasapp son algúns exemplos. Ademais poderemos gozar do seu amplísimo catálogo de filmes de ficción (O que arde, Malencolía, A illa das mentiras, Cuñados, Quen a ferro mata, Engurras, Ons, Eroski Paradiso, Lúa Vermella, O descoñecido, A esmorga…), documentais (Benposta, soño e realidade; Os días afogados, Nación, Trinta lumes, Vigo 1972…), series de televisión ac tuais (Saudade de ti, Auga Seca, A Estiba, Operación Marea Negra, O sabor das margaridas…) e históricas (Pratos Combinados, Mareas Vivas, Padre Casares, Matalobos, Serramoura…); programas culturais (Zigzag, Zeta, As mil e unha páxinas…) e musicais (Cantos rodados, Ondas novas, Alalá, 100 anos de verbena galega, No carro da música…) e multitude de contidos sobre historia, gastronomía, viaxes, etc.

Eroski Paradiso

Xabarín.gal, volve o porco bravo máis famoso de Galicia

REVISTA NOVEMBRO

A outra gran nova da semana é a creación de xabarin.gal, unha canle infantil que recupera o espírito do mítico programa que marcou a varias xeracións de galegos e galegas. Aínda que non todas as series están dispoñibles, si que podemos atopar clásicos como Evangelion, O detective Conan, As aventuras de Rocky e Bullwinkle, Teletubbies ou Rantaro, o ninja pequeno, ademais doutras como Sarxento Keroro, Kiteretsu (spin off de Doraemon), Cocorico, A tropa de trapo, Ideafix, Spirit ou Sakura, cazadora de cartas. Tamén hai dispoñibles uns poucos filmes, como Valentina, A galiña Turuleca, Meigallos, Maimiño e A tropa de trapo no país onde sempre brilla o sol.

Esta novidade non sería posible sen o traballo da Mesa pola Normalización Lingüística. Hai 3 anos que esta asociación lanzou a Iniciativa Xabarín reclamando contidos infantís e xuvenís en galego nas televisións públicas. Co apoio de 33000 sinaturas a iniciativa debateuse no Parlamento galego en maio de 2021, que aprobou un aumento da oferta en galego destinada á infancia e mocidade dispoñible en todos os dispositivos e plataformas de contidos audiovisuais, así como aplicacións actualizadas.

Tiveron que pasar tres anos para que a iniciativa se fixera realidade: “Foron as 33000 persoas que asinaron a Iniciativa Xabarín e todos os concellos e entidades sociais que apoiaron a proposta as que impulsaron este triunfo da sociedade galega que hoxe celebramos”, domentou na presentación Xela Armas, secretaria xeral da Mesa. “Tivemos que insistir, recollendo máis sinaturas para que non se seguise atrasando a disposición” e “seguiremos insistindo, para que se cumpra todo”, afirma Armas, quen recordou, tamén, que o Estado debe facer cumprir a Lei audiovisual a todas as operadoras e plataformas, comezando por TVE que só emite en galego 25 minutos diaros de 120 horas totais e 2 títulos en RTVE Play dos 4 con VO en galego.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.