VIALIA
bannerPicnicSesions

Cándido Pazó: «Algúns programas da TVG fan que se asocie o galego ao choqueiro»

Publicado o por

[Esta entrevista foi publicada na reportaxe Á reconquista da lingua, da revista de Maio do 2019. Pincha aquí para volver ao artigo principal]

Vigués asentado en Vedra, é un dos dramaturgos e actores teatrais máis recoñecidos do panorama galego. Tamén destaca como guionista de televisión e narrador oral. Na actualidade dirixe a compañía Contraproducións, participando activamente nas súas obras.

Alén do teatro, tamén escribiches para a televisión. Que papel xoga este medio á hora de ensinar e difundir un idioma?

Debería cumprir un papel primordial porque é o medio máis popular que hai. Téndese a falar como se fala na televisión e nela fálase un estándar que se supón neutral, que normalmente coincide co que falan as clases medias e instruídas da capital. A base fonética que en xeral se usa no galego falado na TVG é, en grande medida, a do castelán. É como se cantasen unha canción na que a letra está en galego pero a música en castelán.

Por que cres que tenden a ter máis popularidade os produtos de comedia en galego que os xéneros dramáticos?

REVISTA ABRIL

É coma a carioca co rabo na boca. Eses son os produtos que se fomentan e, xa que logo, os que se fan populares. Unha tendencia coa que está a facérselle un grandísimo dano á lingua porque fai que o espectador asocie o galego ao choqueiro, ao vulgar. Por non dicir que o nivel lingüístico deses produtos sofre unha falta de atención intolerable.

Que tal está a funcionar Commedia, despois de ser elixida como o mellor espectáculo nos XXIII Premios de Teatro María Casares?

Cando montaramos o espectáculo hai 25 anos xa tiveramos varios premios. Tiñamos a esperanza de que ao remontalo anos despois puidésemos conectar de novo co público e ter, máis ou menos, o mesmo éxito. E parece que esa esperanza se está a cumprir. No ámbito do teatro en xeral, a maior queixa está no tema da programación en cidades como Vigo, e na escasa promoción dos medios de difusión.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.