Vigo acollerá o Día Internacional de Muiñeira cun desfile multitudinario

O próximo 18 de maio Vigo, a cidade de Galicia co maior número de grupos de música e baile tradicional, celebrará o Día Internacional da Muiñeira. A xornada arrincará o domingo 18 de maio cun desfile, ás 11:00 h da mañá, dos grupos participantes desde a Praza do Rei ata a rúa Venezuela. As formacións interpretarán unha muiñeira, unha xota e unha riberana ao son do grupo de Gaitas Airiños do Parque de Castrelos.

A organización prevé a participación de 35 formacións, entre as que se atopan as conformadas por centros de ensino, asociacións xuvenís, culturais e veciñais, ademais das dos centros parroquiais, dos grupos folclóricos, ou calquera entidade que conte con grupos de baile tradicionais. No caso de superarse o máximo de participantes previstos terán preferencia as formacións de Vigo.

O prazo de inscrición permanecerá aberto ata o luns 24 de marzo. As anotacións poderán realizarse directamente na asociación e a través do mail asociacionculturalinterfolk@gmail.com

Tamén se anunciaron as vindeiras datas do programa gratuíto de Bailes en Vigo:

• Sábado 22 de marzo – Asociación de veciños de San Miguel de Oia
• Sábado 5 de abril – Asociación de veciños O Carballo (Sárdoma)
• Sábado 26 de abril – Asociación de veciños de Candeán
• Sábado 10 de maio –  Asociación de veciños de Beade
• Sábado 24 de maio – Centro Cultural e Recreativo de Cabral