REVISTA SETEMBRO

Os vigueses elixen a mellor hamburguesa de España a partir do xoves 22

Publicado o por

Vialia acolle entre o xoves 22 de agosto e o domingo 1 de setembro o festival gastronómico The Champions Burger no que compiten 19 restaurantes por ofrecer a mellor hamburguesa de España. O publico poderá probar e votar á súa favorita.

19 restaurantes en formato foodtruck instalaranse durante 11 días na praza do Centro Comercial Vialia, entre o 22 de agosto e o 1 de setembro. Cada un deles ofrecerá unha hamburguesa gourmet que compite por ser a mellor de España dentro do concurso The Champions Burger. Esta competición gastronómica, da que tamén desfrutaron na Coruña a pasada semana, caracterízase porque é o público, e non un xurado profesional, quen decide as hamburguesas que pasan á seguinte fase.

Os restaurantes que estarán en Vigo son: La Muralla (Mellor Hamburguesa de España 2023), Jenkins (Mellor 2022), Moflete, El Tarantín Chiflado, Torriko, Rico, Vacarnal, Circo, Umbrella, Soul Coffe Beer, Gottan, Nola Smoke, The Bertys, Guinness, El Barco, Dak Burger Street Food e Carnivale Burger, esta última da Coruña, a única galega. Todas as hamburguesas teñen un prezo unificado de 12,50 €.

Ademais de hamburguesas, no evento atoparemoso foodtruck de polo frito Cheeck’s; Ybarra truck, de patacas fritas e Doritos, con variedade de nachos para combinar con diferentes carnes e salsas. Para os máis lambóns hai dúas propostas con doce: os donuts de Pastelería Loan e as tortas de queixo de As Torres de Ciriaco. Tamén se instalarán postos de bebidas.

A burger máis votada polo público clasificarase para a final española do próximo outono, onde competirá polo título de Mellor hamburguesa de España e, posteriormente, elixirase a mellor de Europa, consolidando o carácter internacional do campionato.

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.