ONyVÁ!, exclusivas ceas secretas
ONyVÁ!, a axencia de márketing capitaneada por Graciela Castro, é coñecida pola orixinalidade das súas propostas, como os mercados de artesanía que organiza ou as exitosas ceas secretas que celebra en diferentes puntos de Galicia.
![](https://amovida.gal/wp-content/uploads/2024/06/aigiboga.jpg)
Hai máis dunha década que Graciela Castro tiña en mente crear unha marca persoal onde facer voar a súa creatividade, o que deu pé ao nacemento de ONyVÁ! Ademais de realizar accións de markéting e levar a comunicación de diversas empresas, esta axencia é coñecida pola orixinalidade das propostas como por exemplo os mercados de artesanía que organiza. Este verán xa hai algúns confirmados en Portosín e en Rianxo, por exemplo.
Pero se algo que destaca sobre o resto da oferta, son as ceas secretas; eventos gastronómicos exclusivos, de capacidade reducida, cun chef vangardista aos fogóns, que se celebran en localizacións moi singulares: o buque Hidria atracado no porto de Vigo, a igrexa da Madalena en Ribadavia un invernadoiro de Viveiro ou un peirao da Ribeira Sacra foron algúns dos espazos escollidos en pasadas ocasións.
![](https://amovida.gal/wp-content/uploads/2023/07/aigiboga-4.jpg)
Esta iniciativa debutou en 2017 e cada ano gaña máis adeptos, como demostran os centos de persoas apuntadas na lista de espera. O ano pasado esgotáronse en minutos as máis de duascentas prazas dispoñibles para as cinco ceas organizadas. Esta semana esgotáronse en tres minutos as entradas para a cea na provincia de Pontevedra.
Pero aínda hai opcións de acudir a algunha das tres ceas que se celebrarán proximamente. Para este verán programáronse catro veladas, unha por provincia, onde poder desfrutar dun ambiente especial e íntimo onde poder gozar da comida, da compañía e dunha ampla selección de cervexas Alhambra, o patrocinador principal do evento. «A incerteza é o piar principal desta experiencia sensorial», resume Graciela, que está encantada pola confianza da xente na súa tan orixinal proposta.
![](https://amovida.gal/wp-content/uploads/2023/07/aigiboga-5.jpg)
olaonyva.com | onyva@olaonyva.com | 680 22 34 57 | @ola_onyva | @cenasecretas
Pablo Vázquez
Últimos posts de Pablo Vázquez (ver todos)
- O TerraCeo volve á terraza co concerto de Rebeliom do Inframundo - 20 Xuño, 2024
- Unha gran batea flotante invade a Porta do Sol ata xullo - 13 Xuño, 2024
- Nace ‘Coia o Caos’, a webserie viguesa máis canalla - 11 Xuño, 2024
- Entre fentos, fotografía con naturalidade - 11 Xuño, 2024
- ONyVÁ!, exclusivas ceas secretas - 7 Xuño, 2024