A nova faciana da muralla do Castro: iluminación, túneles e gradas

Desde hai meses, estase a traballar nunha rehabilitación da muralla da fortaleza do Castro, un dos maiores bens arquitectónicos e históricos da cidade. Estes cambios consistiron na limpeza dos muros e da súa iluminación pola noite, construcción de novas gradas, bancos e escaleiras e eliminación dalgúns elementos como casetas ou postes de electricidade. A maiores, existe unha porta a un dos túneles interiores da edificación, que será visitable no futuro.

Que dúbida cabe de que o Castro é un deses espazos a protexer e agarimar na nosa cidade. A actual fortaleza data do século XVII e formaba parte, xunto co Castelo de San Sebastián e as xa desaparecidas murallas da cidade, dun conglomerado defensivo estratéxico ideado para evitar os ataques dos exércitos de países como Portugal ou Inglaterra. O levantamento desta construcción é, segundo o historiador Antonio Giráldez, un dos grandes fitos da historia de Vigo.

Volvendo ao presente, xa se poden ver os diferentes cambios efectuados tanto nas murallas como nos arredores. Levouse a cabo unha limpeza dos muros e a colocación de numerosas fontes de luz para facer visible a edificación pola noite. Neste proceso procedeuse á tala dalgunhas árbores, decisión que levantou polémica debido á tendencia arboricida do Concello nos últimos anos (Gran Vía, Ronda de Don Bosco…).

Sobre isto, Giráldez opina que “todo o que se faga para visibilizar o castelo mellor conservado do século XVII en Galicia paréceme interesante”, comprendendo a controversia pero sinalando que esas árbores tapaban a fortaleza. Neste aspecto, lembra a construcción do restaurante El Castillo no extremo norte da muralla, “un auténtico pegote” que afortunadamente foi derrubado no 2013.

A iluminación non só está presente na muralla, tamén nalgúns dos seus pasadizos, como podemos ver na galería de imaxes de arriba, cortesía da conta de Twitter Vigo Vindeiro (@VigoVindeiro). A través destas fotos tamén podemos ver as novas escaleiras que facilitan a entrada pola porta norte, a eliminación dalgunhas construccións ou postes eléctricos e a entrada aos túneles subterráneaos, que están a ser rehabilitados para acoller visitas no futuro. Polo que se coñece, estes pasos de 1,70m de altura e metro e medio de anchura unen a fortaleza con diferentes puntos da cidade, como o Castelo de San Sebastián (actual sede do Concello).

Xunto coa iluminación, o cambio máis notorio é a colocación dunhas gradas de formigón na cara máis septentrional do forte. No apartado positivo, destacar que é unha zona idónea para gozar das vistas e tumbarse na herba a tomar algo. No negativo, o impacto visual do material utilizado é moi grande, xerando unha gran contraposición coa pedra da muralla. É habitual neste tipo de remodelacións utilizar diferentes materiais para destacar a parte nova da orixinal, pero quizais unha pedra máis similar ao granito dos muros tería sido mellor opción.

The following two tabs change content below.

• Bio
• Últimos posts

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.

Últimos posts de Pablo Vázquez (ver todos)

• Buscamos imaxes e historias para manter viva a lembranza do Súbete ao Castro - 20 Novembro, 2024
• Elite Barber Shop: tradición e modernidade - 20 Novembro, 2024
• O “fracaso estrepitoso” do Súbete ao Castro ou como non entender a cultura local - 15 Novembro, 2024
• O Cirque du Soleil volve a Galicia cun orixinal espectáculo en pavillóns - 13 Novembro, 2024
• Reúnese Foggy Mental Breakdown, o ‘dream team’ da música viguesa - 6 Novembro, 2024