CAMELIAS

Evangelina leva áncoras

Publicado o por

O pasado mércores saiu á mar por primeira vez en Vigo a Goleta Evangelina, unha embarcación construída en 1912, catalogada como buque histórico, que desde xa está dispoñible para coñecer a ría a bordo, ofrecendo paseos turísticos a medida con posibilidade de cátering con produtos do mar.

A goleta Evangelina en Portocultura | Fotos: Lara Alonso

Evangelina, unha goleta de principios do século XX, trasladouse a principios de semana ao molle Portocultura de Vigo. Chegou desde a Ría de Noia onde foi construída en 1912 e restaurada en 2007 para reconvertila en embarcación turística. Os seus doce metros de eslora servían orixinariamente para o transporte de mercancías dun lado a outro da ría e a compra e venda de peixe entre as embarcacións e as vilas costeiras, xa que o seu pouco calado permitíalle entrar con maios facilidade que un pesqueiro en peiraos e praias.

Á fronte da súa xestión en Vigo está Bluscus, empresa especializada en turismo mariñeiro que conta con outras dúas embarcacións tradicionais. A bordo da Goleta Evangelina, ademais de desfrutar da beleza da ría, os navegantes recibirán explicacións sobre os recursos naturais e hostóricos da ría, como a industria conserveira e das bateas, a gastronomía, as artes de pesca e as Illas San Simón e Cíes. Todas elas están pensadas tanto para estranxeiros como para locais “que moitas veces descoñecen a súa propia contorna e adoitan ser os que saen máis contentos”, comenta Pablo Mariño, fundador de Bluscus e guía.

Evangelina ten unha capacidade de 12 pasaxeiros, máis guía e tripulación. As persoas que desexen navegar a bordo dela poderán reservala a través da web de Bluscus deseñando a experiencia completamente ao seu gusto. A navegación pode ser de 2, 4 e 8 horas e pódese elixir o percorrido a realizar, puidendo visitar as Illas Cíes, a Illa de San Simón, as bateas do mexilón ou incluso realizar excursións nocturnas para a observación de estrelas. Ademais poderemos engadir un cátering de produtos do mar, con mexilóns seleccionados, empanada, conservas galegas e viño das Rías Baixas. A maior parte dos paseos realizaranse a motor, pero tamén se poderá realizar navegación a vela . Sempre baixo demanda, xa que as velas, de gran tamaño, precisan da forza de catro persoas para ser izadas. Os prezos por saída comezan en 500 € por grupo.

A goleta únese á oferta xa existente no molle Portocultura, onde tamén se atopa o barco a vapor visitable Hidria e o miradoiro submarino Nautilus, xestionados pola Fundación Traslatio.”Queremos converter Vigo no porto de referencia de navegación tradicional”, resume Mariño.

REVISTA OUTUBRO
The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.