REVISTA ABRIL

A poeta Xela Arias será homenaxeada nas Letras Galegas 2021

Publicado o por

A Real Academia Galega dedicaralle a Xela Arias o Día das Letras Galegas de 2021. Así o acordaron os académicos na sesión do martes 22 de decembro ao considerar á poeta de Sarria autora dunha poesía singular, transgresora, sincera e comprometida. A RAG lembrará ademais durante o 2021 o seu labor como editora e tradutora que verteu milleiros de páxinas de clásicos universais ao galego.

A protagonista das Letras Galegas 2021 naceu en Sarria en 1962 e finou en Vigo en 2003, cidade á que se trasladou para estudar filoloxía sendo adolescente e onde viviu a maior parte da súa vida. Ademais de escritora, Arias foi profesora en varios institutos de Vigo, Moaña, A Guarda e Chapela.

Xela Arias formou parte dun grupo de poetas que tamén recibirán a homenaxe da RAG a través dela: o dos mozos e mozas que renovaron a poesía a partir dos primeiros 80 en temas, estilo e forma. Concibía a poesía como un xeito de indagar e cuestionar a orde das cousas, de describir o que se aprende a ocultar. A pescuda do eu fonda e reflexiva, a afirmación do corpo feminino, a perspectiva de xénero e a procura de novos espazos para a poesía mediante a recitación ou o diálogo coa fotografía, a música e a pintura, son algúns dos trazos destacados da súa voz como creadora, que anticipou nos anos 80 do século pasado moitos temas e características formais da poesía galega dos 90.

A elección de Xela Arias como protagonista das Letras Galegas 2021 recoñece a dimensión pública e comprometida da vida e da obra da autora. Prestou a súa voz en mobilizacións cívicas, coma as que se produciron tras a marea negra do Prestige, e tomou sempre posición a favor da lingua galega, non só como poeta. Como parte do equipo de Edicións Xerais, onde traballou dende 1980 a 1996, contribuíu ao proceso de fixación da norma do galego. Fíxoo como correctora de estilo e editora, e tamén ao iniciar nos anos 80 un labor pioneiro no mundo da tradución, un eido poucas veces recoñecido.

REVISTA ABRIL
The following two tabs change content below.

Paula Cermeño

Licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado atopala en moitos dos saraos vigueses.

Publicaciones relacionadas:

  1. Diego Giráldez entrevista a catro escritoras galegas en ‘De Letras e Galegas’
  2. Propostas para ver, ler e escoitar a Xela Arias
  3. ‘Vencerse é cousa de se tratar’, unha homenaxe a Xela Arias
  4. O Museo do Mar inaugura a exposición “Tigres coma cabalos”, de Xela Arias e Xulio Gil