VIALIA
bannerPicnicSesions

Xa cheira a chouripán: a Reconquista quenta motores

Publicado o por

A ansiada Reconquista xa está aquí. Esta fin de semana comezan os primeiros actos e representacións, que terán o seu punto álxido a semana que vén, entre o venres 15 e o luns 28. Malia que parte da programación está por descubrir, xa hai confirmados uns cantos eventos para toda a familia.

REVISTA ABRIL
Batalla entre un soldado francés e un membro da milicia viguesa en 2019 | P. Vázquez

A Reconquista xa está á volta da esquina. Tras dous anos sen saír ás rúas (lembremos que o ano pasado celebrouse unha representación no Teatro Afundación), a festa máis popular da cidade volve a celebrarse. Unha celebración que, como contamos no artigo central da nosa revista de marzo, é obra da veciñanza do Casco Vello, que traballa durante moitos meses ao ano para manter viva esta tradición iniciada hai 25 anos. Para os máis famentos, o Retapas está a ter lugar nos bares e restaurantes da zona vella desde o 4 ata o 20 de marzo. 29 propostas para probar e repetir.

Esta fin de semana comezan os eventos ás 19:00 na praza do Berbés, onde terá lugar a representación da destitución do alcalde e da corporación profrancesa de Vigo. Ás 21:00, no mesmo espazo, a agrupación tradicional santiaguesa Carapaus acturá para os alí presentes. Seguindo no Berbés, o domingo 19 ás 12:00 tomarán a praza o grupo Monteira Danzas do Mundo, unha asociación que desde 1989 mantén vivas as danzas tradicionais e populares de diversas partes do globo. Xusto despois, ás 13:00, as tropas napoleónicas desfilarán polo Vigo conquistado, oportunidade idónea para achegarnos e dedicarlles unhas fermosas palabras como va te faire foutre!, cochon ou salaud.

Saltamos ao xoves 24, cando as rúas da zona vella serán tomadas polos máis pequenos. A Reconquistiña irá desde a Laxe ata o Berbés, con colofón de Barafunda ás 12:30 na praza. O venres 25 xa empeza a traca final, mais aínda non se coñecen os datos exactos sobre o que acontecerá. Si sabemos que a representación principal terá lugar o domingo 27, e que o día antes, sobre as 19:00 na explanada do Náutico, a banda Sniff and Crash (creadores do hit ‘Choripán’ e formada por membros de The Riggos e mais Pedro Feijoo) ofrecerá un concerto aos seus fieis.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.