‘Polvorones’ reconquista o teatro cómico
Esta fin de semana de reconquista con moita auga e choripáns, deixounos tamén a posibilidade de asistir o domingo a representación do espectáculo cómico e teatral Polvorones no teatro García Barbón. Nel un público, non moi numeroso pero entregado, participou dun espectáculo desenfadado e terriblemente divertido.
Polvorones presentouse na escena cun elenco integramente feminino e unha representación baseada en pequenas escenas cun formato semellante ós sketchs. As historias estaban fiadas polas diferentes aventuras e desventuras dun grupo de amigas (in)fieis. A proposta aliméntase directamente doutros estilos como o Stand up comedy, o monólogo clásico ou o teatro de improvisación, polo que xera un produto dinámico onde o público pode participar.
O escenario responde a ese principio de dinamicidade e componse de elementos móbiles intercambiables que xeran a impresión dun crebacabezas adaptable a cada situación. A simpleza do elemento escénico esixe tamén un traballo extra por parte do discurso e das actrices que o souberon salvar con solvencia.
A comicidade do texto baséase nas confrontacións entre as personaxes e principalmente nos seus ataques de impulsividade. Aínda que non se renuncia ó humor máis clásico, desenfadado ou castizo a obra integra elementos de humor máis intelixente como os conflitos lingüísticos e fonéticos ou os dobres sentidos. Consegue manter unha estabilidade que fai que todos os sucesos sexan divertidos e estean ben combinados.
A actuación do elenco é sensacional. Vese a complicidade entre elas que xorde de moitos bolos do mesmo espectáculo en combinación coa credibilidade que achegan as súas personaxes. Tamén é ineludible sinalar que a comedia esixe unha naturalidade e un perfil que fai que non sexa un eido apto para todos os profesionais, neste caso estas mulleres aproban con nota.
Non podo finalizar esta análise sen mencionar a brillante actuación da viguesa Jazmín Abuín. A actriz, que esta vez xogaba na casa, achega nesta obra unha personaxe con moitísimos matices e que protagoniza un momento de improvisación moi destacado e probablemente co que o público vigués máis gozou.
En resumo, ‘Polvorones’ é un espectáculo que garante rir a esgalla grazas ó traballazo de elenco e texto. Unha obra que elimina as súas limitacións grazas a un ritmo frenético e o dinamismo en escena. Comedia con C maiúsculo.
Últimos posts de David González (ver todos)
- Antonio García Teijeiro: “Ás crianzas gústalles a poesía. Quen lle teñen medo son os adultos” - 3 Xaneiro, 2022
- María Alonso: “A maioría da xente emigrada pasouno moi mal, pero non queren compartilo” - 27 Novembro, 2021
- Francisco Castro: “Debemos reivindicarnos como homes feministas” - 29 Outubro, 2021
- Elena Medel inaugura este venres o PoemaRia - 27 Xuño, 2018
- O reality show de Valle Inclán - 23 Xuño, 2018