bannerCulturgal

O que si podemos facer a partir deste sábado

Onte ao mediodía volveron a saltar as alarmas cun novo paquete de restricións que afectan a case todos os ámbitos da nosa vida. Vigo, ademais, é unha das cidades máis castigadas por estas medidas. Con todo, aínda son bastantes as cousas que podemos facer a partir do venres ás 23:59 para manter vivo o comercio, o corpo e a cabeza.

Imaxe da inauguración da exposición de Manuel Vilariño no MARCO | P. Vázquez

A Xunta de Galicia endurece as medidas para tentar “resetear o sistema”. Estarán permitidos o 100% dos movementos para ir a traballar, á escola, a atender coidados necesarios de menores e maiores, e todos os movementos sanitarios. E o comercio funcionará cos mesmos criterios do resto de Galicia. Así mesmo, pechará a hostalaría, agás o servizo a domicilio e para recollida que si se poderá ofrecer; a práctica deportiva quedará restrinxida a deporte individual; e reducirase o aforo en establecementos culturais, que con esas limitacións poderán seguir funcionando –cines, teatros, auditorios, e outros recintos de público sentado poderán ocupar o 50% de cada sala, cun límite de 30 persoas en interior e 75 en exterior–.

Haberá tamén restricións de mobilidade, é dicir, non se poderá entrar nin saír desta zona ( Vigo, Mos, Nigrán, Gondomar, O Porriño e Redondela), agás por razóns laborais e actividades esenciais. E como antes, obriga de permanecer na casa entre as 00:00 e as 6:00. Estas medidas estenderanse ata as 15:00 do 4 de decembro. Con todo, deixámosvos algunhas actividades que todavía podemos seguir a facer:

TEATRO

Aínda que algúns espazos vén mermada a súa capacidade máxima, estes poden continuar coa súa actividade. Salvo novidade, tanto o Teatro Ensalle como Vigocultura continúan coa súa programación. Esta fin de semana, por exemplo, temos no Ensalle desde o xoves ata o sábado estará In Anima Vil, ás 20:30; e Vigocultura con O Premio o venres, Armazenados o sábado (ambos ás 20:30) e Rock Cirk o domingo (ás 18:00). A Sala Ártika acaba de anunciar a cancelación do espectáculo de títeres para crianzas Burbuja, programado para este fin de semana porque a nova normativa reduce o seu aforo a 30 persoas o que fai inviable o funcionamento da sala. Non obstante, xa solicitaron a Xunta de Galicia a ampliación de aforo a 50 persoas (tal como ven recollido no DOGA do 4 de novembro) e están agardando unha resposta para poder continuar coa programación de novemebro.

CINEMA

Os cinemas, igual que as salas de teatro, continúan abertos. Por iso cómpre botar unha ollada á carteleira dos diferentes espazos para ver cal é o filme que máis nos apetece visionar. Nos Yelmo, no CC Travesía, podemos ver Lúa Vermella, a última película do director vigués Lois Patiño. Se agardamos ata o luns teremos unha dobre sesión (18:00 e 20:30), con presenza do realizador, no Cineclube Lumière, no Auditorio do Concello. Ademais, segue activa a opción online do Galician Freaky Film Festival ata o domingo 8 de novembro. Podes ler aquí a nosa crónica para non perderte nas máis de 10 horas de cinema freak. Como sempre, podes consultar o catálogo dalgunha das grandes plataformas de visionado baixo demanda a ver se atopas algunha obra made in Galicia.

MUSEOS

As salas de exposicións tampouco caeron con estas novas medidas. Podes pasarte pola nosa axenda de exposicións para consultar a ampla variedade de mostras que hai agora mesmo na nosa cidade: fotografía, pintura, escultura… Para filtrar algo a información, na nosa revista de novembro fixemos un artigo sobre algunhas delas: Cubo, Apo’strophe, F**k this studio ou Afundación. No MARCO, por exemplo, podemos atopar as exposicións de Manuel Vilariño e Celeste Garrido.

BIBLIOTECAS E LIBRARÍAS

As novas restriccións tampouco poden ser unha excusa para non ler. As bibliotecas públicas, a Juan Compañel e a Xosé Neira Vilas, continúan abertas e co servizo de préstamos a toda máquina. Pola súa banda, as librarías tamén seguen a prestar os seus servizos, como poden ser Librouro, Cartabón ou Versus.

Outra iniciativa que acaba de nacer é todostuslibros.com, un portal web creado por librarías de todo o Estado que busca competir contra Amazon na venda online de libros. Outra forma máis de axudar a estes establecementos nestes tempos que corren.

DEPORTE

Segundo o DOGA, “a práctica deportiva quedará restrinxida a deporte individual“, polo que se descartan deportes como fútbol, balonmán, baloncesto ou pádel. Si se pode realizar deporte individual en ximnasios, cun 50% de aforo e sen contacto físico, e clases grupais dun máximo de 6 persoas máis o monitor.

Do venres ao domingo terá lugar Virtual Playa, o reto solidario da Bootcamp que consta dunha serie de exercicios guiados por unha app que substitúen á carreira de obstáculos sen perder a esencia do evento: a praia, o esforzo e o compromiso co medio ambiente.

RESTAURACIÓN

Como comentamos, a restauración terá que pechar a partir do sábado ás 00h, a pesar de que poden manter o servicio a domicilio e de recollida en local. Por mencionar algúns, Trepia Gastronomía mantén a entrega a domicilio, tanto de comidas como de pan bao. O mesmo con Verde Mostaza a través da plataforma DBarrio ou El Mono Vintage con comida para levar. La Tienda de Paz mantén aberto o seu servizo en tenda e a domicilio. A Cervexería Nós, da que falamos a semana pasada pola súa colaboración con Rei Zentolo, non poderá abrir pero si poderán entregar os seus produtos polas casas.

bannerAfundacion
The following two tabs change content below.

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É co-director do documental Cuna de Músicos, o que lle fixo coñecer aínda máis a escena musical viguesa. Ten traballado con distintos grupos e locais da cidade, ademais de participar nos últimos anos como Xurado Novo en festivais de cine como o de San Sebastián e Novos Cinemas.
Compartir
X