Numerosas actividades ao longo do mes polo Orgullo LGTBI+
Coloquios, concertos, festas drag, proxeccións, exposicións, senderismo, mesas informativas, obradoiros, maratón fotográfica… este é o mes do Orgullo e a Asociación Nós Mesmas ten unha chea de actividades preparadas desde hoxe ata o 29 de xuño, o día grande.
A Asociación Nós Mesmas é unha organización feminista que nace en 2008 da man dun grupo de mozas novas e que se plantexaron como obxectivo contribuír a construcción de vías alternativas de pensamento para acadar as condicións necesarias para o exercicio e pleno disfrute por parte das mulleres lesbianas, bisexuais e transexuais dos seus dereitos.
Para este mes teñen organizadas unha gran cantidade e variedade de actividades orientadas a dar visibilidade e a loitar polos dereitos das persoas LGTBI+. A primeira será hoxe coa inauguración da exposición Sen Moldes na Casa das Artes ás 19:00, que se poderá visitar ata finais de mes. Esta mesma semana haberá un parladoiro sobre “Migrar para ser ceibe, situación das persoas migrantes LGTBI” o martes 11 ás 19:30 na Oficina Municipal do Distrito, a II Noite Drag o 15 á medionoite no Mogambo e o domingo unha xornada de sendeirismo e encontro familiar no Vixiador, con actividades para crianzas.
O martes 18 ás 19:00, no Centro de Documentación Feminista da Biblioteca Juan Compañel, terá lugar o coloquio “Autoras galegas rachando cos moldes” con Iria Misa e Eva Mejuto. Ese venres, ademais das mesas informativas na Rúa Príncipe desde as 17:30, proxectarase no MARCO o documental Vida e morte de Marsha P. Johnson ás 19:30. Para rematar a semana, Vermú TransMaricaBiBollo na Ronda de Don Bosco o sábado 22 e por San Xoán fogueira ceibe LGTBI+ ás 21:00 na Praia de Carril.
O luns 24 poderás unirte á mesa redonda “Corpos disidentes” na ONCE ás 19:30, onde falarase das sexualidades e corporalidades fora das marxes do normativo. O 26 haberá outra mesa redonda, neste caso “Xogamos Seguros: VIH, VPH, Prep, Pep…” no MARCO á mesma hora. O 28, ademais da mesa informativa Stonewall Inn en Príncipe, haberá unha proxección do documental Me llamo Violeta nos Multicines Norte ás 20:10.
Por último o sábado 29 de xuño será o día grande na Praza da Pedra durante toda a xornada. Iniciarase o I Maratón Fotográfica do Orgullo, haberá obradoiros, actuacións, música, lectura do pregón e do manifesto, DJ e unha multitudinaria manifestación ás 20:30.
