CAMELIAS MASCOTAS

Dafne Míguez: “María Pita tiña moi claro o que era seu, o que quería e o que lle pertencía”

Publicado o por

O proxecto Cruña Invicta foi un dos gañadores do certame Xuventude Crea 2020 na sección de Creación de videoxogos. O traballo, desarrollado por catro estudantes do grao de Comunicación Audiovisual na Universidade da Coruña, recrea a batalla de 1589 en A Coruña, centrándose no icono de María Pita. Hoxe falamos coa viguesa Dafne Míguez, unha das responsables do videoxogo.

REVISTA NOVEMBRO
  • Cruña Invicta, 2019
Cruña Invicta xorde como un traballo de fin de grado de Comuniación Audiovisual no 2019 mesturando o videoxogo e o documental nun proxecto didáctico sobre a batalla de 1589 en A Coruña, co ataque dos ingleses á cidade. Dafne Míguez, Daniela Da Rocha, Antía Santiso e Araceli Villanueva son as responsables de creación do proxecto e estudantes do grao de Comunicación Audiovisual na Universidade da Coruña, que impulsou a contar a historia desde un novo punto de vista. Na pasada edición do certame Xuventude Crea acadou o segundo premio na sección de Creación de videoxogos, dando a coñecer a nivel galego o proxecto e toda a historia e traballo que hai detrás da pantalla.

O xogo recrea desde a chegada en barco dos ingleses, ata as batallas en terra pasando polo castelo de San Antón, a Torre de Hérculos e outros espacios memorables da cidade. Pero sen dúbida a columna vertebral da historia é o personaxe de María Pita, icono emblemático da provincia galega. “Nós coñecíamos a figura pero de xeito superficial” afirma Dafne, “para ser unha personaxe tan coñecida, en realidade, a xente o que sabía sobre o que pasara para que ela se acabara convertindo nun mito era moi pouco.” Definida por historiadores como ‘heroína galega‘ e obsequiada na Coruña cunha gran praza no centro neurálxico da cidade, as creadoras de Cruña Invicta van máis alá loitando por amosar ao mundo unha parte máis persoal e pouco coñecida da personaxe. “María Pita era botada para adiante e preocupada por defender o seu. Tiña moi claro o que era seu, o que quería e o que lle pertencía, chegángose a meter e liortas legais para demandar á xente. Era unha figura moi chamativa para esa época”, comenta a creadora.

Dividido en bando coruñés e bando inglés, o videoxogo conta con varios personaxes que narran a historia desde o seu punto de vista, como o comisario Drake, acompañado de Adam, ou Antón, colaborando con María Pita. Neste caso, os xogadores participan na pel de personaxes anónimos mentres descubren e aprenden sobre a batalla. “O público interesouse moito. Tendo en conta o tempo que ten o proxecto, que a xente siga achengándose a nós para saber máis do videoxogo é moi gratificante”.

Ademais do vídeo e a imaxe, con diferentes espazos tanto de día como de noite, Cruña Invicta destaca pola súa banda sonora composta con Fernando Rouco, que lle ofrece dinamismo e carácter á historia. “Fernando era compañeiro noso da carreira e desde o primeiro momento que comezamos a crear o proxecto el estaba en mente. Tiñamos plena confianza en que ía facer moi bo traballo, e creo que o resultado o merece. Meteuse na historia da época e no seu contexto cun punto de vista histórico”. Tanto en Apple Music como Amazon ou Spotify, as seis cancións que conforman a banda sonora do videoxogo están ao alcance do público para poder escoitar as pezas que nos levan á séculos pasados.

O segundo premio do certame Xuventude Crea 2020 organizado pola Xunta de Galicia axudou as creadoras a expandir o proxecto e a historia por toda Galicia. “Antes o círculo de persoas ás que podía chegar era máis reducido, pero o premio puxo o foco no proxecto. Persoas alleas á contorna interesáronse polo videoxogo”, asegura Dafne Míguez. Con catorce modalidades en total para participar, Xuventude Crea inaugurou a sección de videoxogos no propio 2020, abrindo unha ventá para novos creadores como é o caso de Cruña Invicta ou Odal (primeiro premio) e Fofo e a pesca de lixo (terceiro premio).

Cunha sociedade que vai medrando pouco a pouco e eliminando partes do prexuízos dispostos desde hai anos, a graduada en comunicación audiovisual e dirección de arte e deseño afirma que os tempos e a idea do videoxogo están a cambiar “Non só está cambiando a imaxe que a xente ten dos videoxogos e das persoas que xogan, senón que ademais tanto os videoxogos como os xogadores son máis diversos, desde a xente que xoga ao CandyCrash no móbil ata a xente que non é un xogador activo pero que se mete neste mundo.”

O venres 20 de agosto remata o prazo para inscribirse nunha das especialidades do certame (artes plásticas, banda deseñada, cociña, creación de videoxogos, danza moderna, deseño de xoias, fotografía, graffiti, moda, música, novela curta, poesía, teatro, videocreación), que impulsa o talento emerxente galego e condece premios entre os tres primeiros gañadores valoradores en 3.000€, 1.500€ e 1.000€