VIALIA
bannerPicnicSesions

Concertos, foliada e carnes á grella para a inauguración de O Faneco en Beade

Publicado o por

Este sábado abre as súas portas O Faneco, a proposta de Ubaldo Méndez para o restaurante do Parque Forestal de Beade, baseada en carnes e peixes a grella e cociña tradicional. A inauguración será un gran evento con música desde as 13h ata a noite.

Ubaldo Méndez en maio, na porta do asador aínda en obras

Ubaldo Méndez levaba un tempo atrás deste privilexiado local situado no monte veciñal de Beade, a poucos metros do miradoiro panorámico do que fai gala o Parque Forestal da parroquia das cereixas. O hostaleiro é coñecido na cidade por rexentar un animado bar de copas durante case unha década na Rúa Real, O Faneco.

Co mesmo nome nace agora o seu novo proxecto, que conserva do anterior o ambiente enxebre, popular e a vontade de pasalo ben. Tras varios meses de traballo para modernizar as instalacións, o sábado 2 de xullo abre as portas O Faneco, un asador que conta cun amplo salón interior e tres terrazas nas que degustar da comida na inmersión da foresta.

REVISTA ABRIL

A oferta gastronómica do Faneco é tan sinxela como apetecible. O punto forte da carta son as preparacións á grella, da que saen pratos de churrasco, costeleta e entrecosto de tenreira galega, así como peixes e verduras. «Temos instalada unha grella con tres espazos diferenciados, para que a carne non sexa a única protagonista», explica este coñecido hostaleiro. De entrante, tapas tradicionais para compartir; como tortilla, pementos ou luras. Ademais O Faneco planea abrir as portas antes da hora de xantar, para desfrutar de sesións vermú que decote estarán aderezadas con música ao vivo.

Para poñer todo isto en práctica Ubaldo organiza este sábado, 2 de xullo, unha gran festa de inauguración, con actuación de Os cuncheiros e Nós Folk a mediodía; foliada de 17h a 21h aberta a todo o público e El pelotón de los torpes e outro concerto por confirmar a partir das 21:30h. A celebración contará cun menú pechado de carne ou peixe á grella con gornición e duas consumicións por 15€.

Enderezo: Parque Forestal de Beade
Facebook: O Faneco Casco Vello
Instagram:      @ofaneco

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.