As mulleres toman a cidade polo 25N
Desde as diferentes organizacións feministas da cidade están a propoñer actividades esta fin de semana para visibilizar e protestar contra as violencias machistas. Ademais, o domingo ás 12:00 da mañá haberá unha movilización na Farola de Urzáiz.
Ano tras ano as movilizacións no 25 de Novembro, Día Internacional da Non Violencia Contra a Muller, son cada vez máis numerosas e sonadas, o cal quere dicir que o compromiso e a loita contra esta inxustiza non deixa de medrar. Diferentes organizacións feministas están a organizar actividades de visibilización coa fin de que estes apoios perduren durante todo o ano e non só no 25N.
O venres 23 haberá unha performance e unha manifestación silenciosa organizadas por Feminismo Unitario de Vigo. A performance, titulada ‘Loita feminista contra o terrorismo machista’, terá lugar na Praza da Pedra ás 19:00. Tras o espectáculo, as asistentes realizarán unha manifestación nocturna e silenciosa, de carácter non mixto. Desde a organización pregan a utilización de roupa negra.
A cuarta edición do programa ‘Mulleres en acción. Violencia zero’,comezará o 23 de novembro en Vigo, ás 19.00 h no salón de actos do Marco coa performance “Nosotras” de Nieves Correa. Coa súa peza pretende facer reflexionar sobre o traballo non remunerado das mulleres nas economías desenvolvidas e ata que punto o noso nivel de benestar se sostería sen este traballo.
O sábado 24, no Mercado de Teis ás 11:30, haberá unha acción de rúa máis unha peza de teatro. Ese mesmo día pola tarde, ás 18:00, presentarase na Casa del Libro a obra Feminicidios, de Carmen Adán. Estará acompañada pola dramaturga e actriz Marta Pérez e polo director xeral de Galaxia, Francisco Castro. Ademais, haberá unha actuación musical a cargo de Carolina Vázquez, alumna de 2º da ESO de Igualdade de Xénero no IES Politécnico de Vigo, que interpretará unha canción composta e escrita por ela mesma para denunciar a violencia machista. Por último, o propio 25N ás 12:00 da mañá, haberá unha movilización masiva de mulleres na Farola de Urzáiz para protestar, unha vez máis, en contra das violencias machistas que seguen sen desaparecer da nosa sociedade.