CAMELIAS MASCOTAS

Vigo queda fóra, un ano máis, do mellor da cultura de 2023

Publicado o por

Como vén sendo habitual, Vigo queda fóra do Mellor da Cultura segundo o informe do Observatorio de la Cultura, unha iniciativa das asociacións La Fábrica e Fundación Contemporánea. Si que recoñen o labor de festivais dos arredores como o Sinsal ou Cans. Podes consultar aquí o informe completo.

Exposición no Marco, única proposta viguesa merecedora de saír no informe do Observatorio de la cultura dos últimos sete anos | P. Vázquez

Fundación Contemporánea presenta o seu informe anual sobre o mellor da nosa cultura en 2023 segundo os seus profesionais. O Observatorio da Cultura elabora desde 2009 unha serie de clasificacións e indicadores relativos á actividade cultural das nosas cidades e comunidades, ás institucións e acontecementos culturais máis destacados do ano ou á evolución anual dos orzamentos das organizacións do sector.

Nesta nova edición do Observatorio de la Cultura o cuestionario foi contestado, durante os meses de novembro e decembro de 2023, por 414 membros do panel, dos que un 46,5% traballan nunha organización cultural pública, un 36,1% nunha organización cultural privada e o 17,4% restante como profesionais independentes do sector.

A Cidade da Cultura de Santiago é primeira este ano, seguida polo Festival Sinsal, CGAC, Teatro Rosalía de Castro (sobe 8 postos), FIOT de Carballo, Cineuropa e o Museo de Belas Artes da Coruña, novo na clasificación xunto a O Son do Camiño, Numax e a película O Corno, de Jaione Camborda. A Cidade da Cultura, o CGAC e a Fundación MOP (Steven Meisel, Helmut Newton), representan a Galicia na clasificación nacional, situándose en sexta posición.

REVISTA NOVEMBRO

No 2022 o Museo Marco, grazas á súa exposición sobre Francisco Leiro, alzouse na oitava posición neste mesmo informe. Sen contar este feito, Vigo non volve aparecer nesta compilación ata o ano 2017, co Marco de novo. Na clasificación de cidades de toda España, Vigo aparece en 26ª posición, mentres que A Coruña ocupa o posto 11 e Santiago o 14.

Destes resultados podemos sacar a conclusión, enganosa, de que a cultura viguesa está a un nivel moi baixo, en especial se a comparamos coa de cidades como Santiago ou A Coruña. Quizais a nivel público sexa certo, pero a nivel privado ou semiprivado estanse a levar a cabo iniciativas do máis interesantes, como o festival Underfest, o Galician Freaky Film Festival, o Pequeártiko, os Multicines Norte, o Festival Creativa, os ciclos Máis que Blues e Musicav ou o TerraCeo, por citar só algúns exemplos. Mesmo fóra de Galicia, pero organizado por galegos e cun cartel 100% en galego, o Festival EmigraSon de Bruxelas foi un dos grandes fitos culturais do 2023.

Sen desmerecer as propostas escollidas, toda elas de gran calidade e sobrada experiencia, o certo é que ano tras ano moitas delas repítense neste mesmo Observatorio, o cal tamén demostra certa autocompracencia dos membros do panel á hora de votar e unha clara predilección polos eventos culturais das cidades do norte.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.