ASNEVES
REVISTA MAIO

‘O Corno’, a gañadora da Cuncha de Ouro, en cines a partir do mércores

Publicado o por

A finais do pasado mes de setembro O corno de Jaione Camborda foi galardoada coa Cuncha de Ouro en San Sebastián, o maior galardón do prestixioso festival de cinema. Por se fose pouco, trátase do primeiro filme da historia nunha lingua cooficial de España que consegue este premio.

O dez minutos iniciais de O corno non deixan moito lugar a dúbidas: estamos ante unha obra crúa, sen miramentos. Iso non implica que estea exenta dunha beleza e dun lirismo penetrante. Estamos na Illa de Arouse, en 1971. María (Janet Novás), gaña a vida como mariscadora, pero tamén é coñecida na aldea polo seu bo facer como matrona nos partos. Un feito inesperado obrígaa a fuxir da súa casa e buscar acubillo ao outro lado da fronteira, en Portugal.

Polo seu ritmo e ruralismo poderiamos encaixar o filme neste movemento que se veu chamar Novo Cinema Galego hai xa case vinte anos, pero O corno é (afortunadamente) máis ca iso. Foxe de vellas fórmulas gastadas e ofrece personaxes que pagan a pena (Janet Novás está espectacular, tamén Siobhan Fernandes), diálogos interesantes e xiros que te manteñen coa vista fixa na pantalla.

A diferenza doutros filmes con guion da propia Camborda, como a fallida Ons de Alfonso Zarauza, aquí o drama intimista é só un elemento máis da película, pero non o único. Aquí hai tamén romance, intriga e cine social. E, sobre todo, diálogos, algo tan escaso en gran parte do cinema galego dramático. Polo xeito de filmar naturalista e a case total ausencia de música, O corno achégase ao documental. En definitiva, unha delicada road movie que xira arredor da sororidade, dos coidados entre mulleres nun mundo complexo e hostil.

Polo momento está confirmado que o filme se proxectará nos Multicines Norte, Cines Tamberlick (en ambos cinemas a directora estará presente este xoves 12) e Gran Vía Cines.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.