CAMELIAS MASCOTAS

David contra Goliat: Alimentación Rivera planta cara ao Concello

Publicado o por

Nas últimas semanas estase a falar bastante do novo proxecto urbanístico da Praza da Igrexa, fronte á Colexiata, que pretende derrubar cinco contruccións para levantar unha nova bautizada como Mutante, obra do estudio de arquitectura LIQE. Nun deses edificios atópase desde hai 65 anos o ultramarinos Alimentación Rivera, protagonista da sección Street Photo da nosa revista de verán. Aí afirmamos que baixaban a persiana de vez, pero unha chamada súa alertounos do noso erro.

José Mario Rivera, no centro, co seu pai sentado detrás | P. Vázquez

Entramos na pequena tenda situada no número 10 da Praza da Igrexa, onde nos atende José Mario Rivera. Seu pai, quen abriu o negocio hai 65 anos, está fóra descansando nunha cadeira. A situación é a seguinte: a familia Rivera, ademais do baixo, ten en propiedade o primeiro andar do edificio. O Concello ofrece 20.000€ polo negocio e 38.000€ polo piso, sumando en total algo menos de 60.000€. Quen estea un pouco ao tanto dos prezos que se manexan hoxe en día no mercado inmobiliario (“unha praza de aparcamento na Alameda custa 70.000€”, apunta José Mario) saberá que esta oferta non parece de todo xusta, e máis tendo en conta o fondo de comercio da tenda (clientela, postos de traballo, facturación anual…).

REVISTA NOVEMBRO

Rivera tamén dubida que o que alí se vai construír sexa de Interese Público, o motivo principal da expropiación, pois a súa finalidade aínda non está totalmente definida. O pasado 26 de xullo o alcalde de Vigo, Abel Caballero, comunicaba que haberá “grandes espazos para uso social en diversas cousas: exposicións, representacións teatrais, reunións e tamén relacionado co sector turístico“. Segundo Rivera, “non podes arruinar a vida dunha familia para facer conferencias e gaiteiradas unha vez ao ano, para iso xa hai outros espazos como a Igrexa, o Auditorio do Concello ou a Asociación Veciñal do Casco Vello”.

O rexente da tenda bota en falta comunicación por parte do organismo público, pois el está disposto a adaptar o baixo e o primeiro andar para amoldalo á nova obra, cambiando a fachada ou engadindo uns soportais. Ademais, se de estética se trata, Rivera pregúntase se a alguén lle gusta o Hotel Bahía, o Centro Comercial A Laxe ou a torre de Toralla. O problema non son tanto os cartos como que lle quiten ou cambien de ubicación o negocio, pois na súa opinión está nunha localización inmellorable: “Montes o que montes vai funcionar, aquí nunca se vai devaluar un local. Levamos dous anos pasándoo mal pola falta de turismo, pero seguimos aguantando, non é un negocio abandonado nin arruinado”.

José Mario non se sinte moi esperanzado con respecto ao que está por vir: “Eu vou pelexar ata o final, e aínda por riba vaime costar moitos cartos. Non descarto, se non hai diálogo nin acordo, encerrarme na miña casa e facer unha folga de fame“, di convencido. Sobre todo sorprendéronlle as declaracións de Caballero o pasado mes de maio nas que dicía que “con ou sen acordo vaise expropiar”, comentario inaceptable nun demócrata baixo o seu punto de vista.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.