CAMELIAS MASCOTAS

Solpor a bocados, o mellor da gastronomía viguesa surca a ría

Publicado o por

Este xoves zarpou a segunda edición de Solpor a bocados, unha iniciativa de Vigo Gastronómico que combina paseo pola ría en barco, música, viño e un coidado menú de oito pratos elaborado polos restaurantes con mellor fama da cidade. A experiencia, que se repetirá cada xoves de xullo e agosto, pode reservarse na web do colectivo hotaleiro.

Fotos: P.Cermeño

No peirao situado entre o Club Náutico e a estatua de Xulio Verne nos espera o Nautilus, un barco oceanográfico que habitualmente serve de nave para a interpretación dos fondos e o medio mariño. Hoxe fará de restaurante informal para a ducia de persoas que viñemos desfrutar de Solpor a bocados, unha experiencia organizada por Vigo Gastronómico con moitos ingredientes para convertisrse na actividade estrela do verán, como xa o fixo o ano pasado: paseo en barco ata a ensenada de San Simón co por do sol tras o Morrazo e a impoñente ponte de Rande, música, albariño a esgalla e un menú de oito pratos creado de forma conxunta polos 11 restaurantes que forman Vigo Gastronómico.

Vigo Gastronómico é un grupo de restaurantes vigueses nado o pasado verán que se uniron para ofrecer experiencias culinarias e turistícas fóra das paredes dos seus establecementos. Está formado por oito chefs comprometidos coa calidade dos seus produtos e a innovación constante na cociña e o sector hostaleiro, todos eles ben coñecidos e recoñecidos polos vigueses: Niño Corvo, Mijo, Lume de carozo, La Carpintería, Kero, Morrofino, La Pintxoteca, María Manuela, Living, La Contenta e O Croque.

REVISTA NOVEMBRO

Juanjo Figueroa, responsable do Lume de Carozo e organizador da viaxe, explica que aínda que cada día veremos aos cociñeiros dun dos restaurantes ocupar a improvisada cociña do Nautilus, o menú foi creado por todos os integrantes, é fixo e será o mesmo nas oito saídas que farán durante o verán, sen importar quen o cociñe en cada xornada. A carta está composta por seis pratos salgados, un cóctel e unha sobremesa elaborados con ingredientes frescos, de proximidade e de calidade e preparados cunha fusión de técnicas tradicionais e vangardistas.

Nos pratos salgados abundan os peixes azuis, como o xurel en escabeche con guacamole, encurtidos e compota de tomate picante; a caballa curada con maionesa de soia; o espectacular salmón vermello con emulsion de pemento de herbón, ou a reinterpretación do marmitako en versión salada. Tamén atoparemos vieiras sobre cebola caramelizada e gofre negro e unha opción con carne: a tosta de steak tartar con allo negro, un dos mellores pratos do menú. Como pre-postre (así o denominan eles), un mojito con anaquiños de melón, suave, doce e cheo de matices frascos e como colofón, unha chamativa sobremesa titulada Pasión ao solpor, que fixo o ídem entre os que tieveron o privilexio de probala.

Aínda que pode parecer un festín excesivo, as cantidades están pensadas para chegar ata o finas con ganas e para que sexan prácticas de comer sobre a cuberta do barco e sen derramar unha gota de viño durante a operación. Tamén o tempo está cautelosamente calculado para que haxa dabondo para conversar entre petisco e petisco, desfrutar do viño e acabar brindando cunha copa de albariño espumoso, antes de regresar de novo ao Porto de Vigo.

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.