CAMELIAS MASCOTAS

F**k this Studio, o novo fogar da arte alternativa

Publicado o por

A finais do pasado mes de xuño naceu F**k this Studio, un pequeno lugar para crear, expoñer e promocionar diferentes propostas artísticas experimentais ou alternativas. Ou como elas mesmas o definen, un “espazo creativo aberto a ideas tolas e movidas varias”.

De esquerda a dereita: Paula Rodríguez, Andrea Costa e Marta Valverde dentro do estudio | Pablo V.

F**k this Studio nace da man de Marta Valverde e Paula Rodríguez, aínda que pouco despois uniuse ás súas filas a ilustradora Andrea Costa. A pesar de que Marta traballa a cabalo entre Bilbao e Madrid no audiovisual e Paula dá clases de arte na China, a imposibilidade de volver aos seus lugares de traballo foi a que desembocou nesta iniciativa conxunta. Este pequeno espazo situado ao fondo das Galerías Plata (Urzáiz 83), preto da praza de Fernando el Católico, funciona pola semana como o seu estudio persoal onde realizar os seus propios proxectos, mais tamén colaborando e intercambiando opinións entre elas.

Mais durante as fins de semana a cousa cambia. As portas abren de par en par para dar cabida especialmente a artistas emerxentes, sexa cal sexa a súa disciplina. A frecuencia destes eventos será cada dúas semanas, pero non descartan variala no futuro. Aínda que polo de agora só levan realizada unha exposición, a do fotógrafo analóxico hyper.view, xa teñen programados diferentes actos ata finais de setembro. O máis próximo será esta finde con yatir meets von, unha exposición do traballo artístico de Yatir Fernández ambientado coa música de VON, que presentará o seu novo disco Neverland.

REVISTA NOVEMBRO

Haberá diferentes quendas de capacidade máxima reducida para visitar o estudio: o sábado 25 ás 12:00 e 13:00 (horario vermú) e de tarde ás 18:30 e 19:30 (horario merenda); o domingo só habería a dobre quenda de tarde, xa que na anterior exposición constataron que “a xente os domingos pola mañá prefire durmir”. Para anotarse a estas visitas cómpre enviar unha mensaxe privada ao seu instagram (@fuck_this_studio) e indicar o horario escollido.

Polo de agora móstranse sorprendidas coa recepción que está a ter a iniciativa: “na primeira expo pensamos que estariamos as tres aquí soas ou que só virían os nosos amigos, pero enchéronse todas as quendas e mesmo quedou xente fóra”, comenta Marta. A labor destas tres rapazas non reside unicamente en prestar o espazo aos artistas, senón que exercen a función de comisariado, escollendo e distribuíndo as pezas para adaptarse a obra en cuestión. Na última mostra, por exemplo, as fotografías estaban colocadas dunha maneira pretendidamente caótica, tecendo unha relación co estilo e temática das imaxes.

Inciden tamén na súa predisposición a colaborar con calquera proxecto ou iniciativa cultural que consideren interesante e, por suposto, realizable a nivel loxístico e económico. Xa que o futuro de Marta e Paula semella estar lonxe de Vigo, a súa intención é que máis persoas se sumen ao estudio, a modo de co-working, e que as actividades non cesen aínda que elas non poidan estar presencialmente.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.