COSTEIRASONORA
REVISTA VERAN

Vigo, cidade de cor: Susie Hammer

Publicado o por

Zuzia Młotek, alias Susie Hammer, vén da Europa do Leste. Máis en concreto de Varsovia, aínda que hai anos que reside en Madrid. A súa obsesión desde que era ben nova é fedellar con plastilina, debuxar, pintar e recortar. Xa o di ela: «Non paraba de producir cousas que regalaba a todo o mundo, era unha nena moi tranquila, pasaba o tempo soa entre lapis de cores, non me movía da cadeira. Hoxe sigo igual». Esta paixón innata levouna irremediablemente a dedicarse de cheo á ilustración infantil. Aínda que ás veces tamén amplía o formato enfrontándose aos muros. É o caso da obra que fixo no Calvario, rematada nun tempo récord de tres días, que alegra o día a día de todo aquel que pasa pola rúa de Cataluña desde o 2018.

Esa é a finalidade das obras de Susie Hammer: animar a vida da xente. Para o conseguir, fai uso dun estilo moi simple, case infantil, entre os estilos naíf e pop. Ela define o seu propio labor como «moi doado e positivo, intentando provocar un sorriso, que divirta, que sexa positivo e provoque unha sensación de ledicia». E iso é o que precisamos hoxe en día.

A foto que ilustra este artigo foi tomada o pasado mes de marzo, co confinamento da poboación acabado de inaugurar en todo o Estado. Aínda lembro esa sensación tan estraña da cidade baleira, triste, con militares polas rúas (algo que aínda me irrita a día de hoxe polo disparate que supón), e buscando algo que ilustrase graficamente o asasino invisible. Indo atrás dun operario que desinfectaba as rúas, topei co mural de Susie, e recoñezo que me sacou un sorriso. Non sei moi ben se polo surrealismo da circunstancia ou polo poder das cores planas da artista polaca que o asina, pero iso é secundario. Porque sa arte fainos humanos, e tanto ten que a técnica sexa barroca, sinxela ou minimalista, profunda ou superficial. Despedímonos coas verbas de Susie: «Coller un pincel e pintar calquera cousa que queiras é un superpoder, un superpoder que ten calquera e co que pode cambiar o seu mundo».

O mural está á altura do número 21 da rúa de Cataluña, no barrio do Calvario.

Texto e fotos: Juan Teixeira

[Esta reportaxe pertence á revista A movida de Decembro de 2020. Podes consultar o número completo neste enlace. Se queres comezar a recibir un exemplar na túa casa, apoiar o noso proxecto e participar en numerosos sorteos, faite #AMOVIDALOVER nesta ligazón. ]

SONRIAS
The following two tabs change content below.

Juan Teixeira

Juan Teixeira é un fotógrafo documental con sede en Vigo. Cursou estudos de Publicidade e RRPP, pero pronto se decatou de que aquel non era o seu lugar. A través dunha serie de viaxes por Sudamérica e o sueste asiático, observou que a fotografía era unha forma de relacionarse e explorar o mundo dun modo moi persoal, coma un espectador que intenta comprender o que sucede ao seu redor. Desde entón intenta comprender ese mundo que o rodea, centrándose nas persoas e as súas relacións con outras persoas, coa sociedade, a natureza e o tempo e o lugar que a cada unha lles toca vivir.

Últimos posts de Juan Teixeira (ver todos)