REVISTA ABRIL

Vigo, cidade de cor: Marta Lapeña

Publicado o por

O outono que deixamos atrás será lembrado por moitas cousas. A nivel internacional, desde logo, o que pasará á historia será o xenocidio contra o pobo palestino na Franxa de Gaza a mans do sionista Estado de Israel, ante a complicidade dun Occidente ruín e submiso. A nivel estatal, probablemente lembraremos o gran circo «Cayetano» que se montou na madrileña rúa de Ferraz. E xa na nosa terra, do que máis se falou nas rúas foi do clima, dado que encadeamos borrasca tras borrasca, tal e como se recorda esta época noutrora. Das condicións meteorolóxicas hase lembrar ben a artista Marta Lapeña despois de pasar pola nosa urbe para nos deixar un exquisito recordo en forma de mural. Ela mesma rememora a estadía como «unha experiencia incrible e dura asemade; días de traballo constante, vento do norte e algunha que outra pelexa co guindastre».

Non se pode saber aínda se a concatenación de baixas presións nada máis acabar a temporada estival ten que ver co cambio climático, aínda que os expertos barallan esa hipótese. Sexa como for, este é o máis grande dos problemas ao que nos afrontamos, por moito que o intentemos negar. O final das estacións e o clima extremo é parte da realidade que temos por diante, por non sabermos coidar da nosa casa. Sobre este tema quixo tamén falar Marta: «Este mural en Vigo, unha cidade pesqueira que continúa mantendo esta actividade económica e cultural, faille unha chiscadela á fraxilidade da biodiversidade, ao estado dos mares que tanto nos dan e que, ás veces, ben pouco respectamos». Oxalá a sensibilidade desta artista sexa contaxiosa e asumamos a biodiversidade como unha parte vital para nós, porque abofé que o é.

O mural sitúase sobre o número 8 da rúa de Benito Castro Nogueira.

The following two tabs change content below.

Juan Teixeira

Juan Teixeira é un fotógrafo documental con sede en Vigo. Cursou estudos de Publicidade e RRPP, pero pronto se decatou de que aquel non era o seu lugar. A través dunha serie de viaxes por Sudamérica e o sueste asiático, observou que a fotografía era unha forma de relacionarse e explorar o mundo dun modo moi persoal, coma un espectador que intenta comprender o que sucede ao seu redor. Desde entón intenta comprender ese mundo que o rodea, centrándose nas persoas e as súas relacións con outras persoas, coa sociedade, a natureza e o tempo e o lugar que a cada unha lles toca vivir.

Últimos posts de Juan Teixeira (ver todos)