bannerRevistaOnline

Vigo, cidade de cor: Pow One

Unha serie de sucesos desafortunados vén marcando a actualidade desde hai máis dun ano. Á colección de infortunios sumábase hai uns meses unha mala nova para a cidade: O Marisquiño marchaba fóra! Os dixomedíxomes correron sen descanso buscando culpables e conspiracións, pero ao final todo quedou nun susto: O Marisquiño queda na casa. De momento…

O que de certo vai quedar connosco por moito tempo, malo será, é o mural co que o artista local Pow One, coa inestimable axuda de PrimAsten,homenaxea o vixésimo aniversario do festival da cultura urbana. 20 metros de alto por 13 de largo como tributo para todas as persoas que fan posible O Marisquiño. O seu autor buscou integrar a obra no espazo que a ampara: «Todo o que hai baixo a figura é un esquema do que se ve desde a rotonda: os farois son os mesmos, por exemplo; e o edificio do lado en negro, é o mesmo perfil dos que conviven co mural».

Banner A Movidiña

Ao xeito dos organizadores do evento, o artista decidiu deixar para o final o prato forte: «Pensei en poñer o logotipo do certame na cara do debuxo, para facelo impersoal e, asemade, que todo o mundo se puidese identificar con el. Pensamos que deixar esa parte para o final alimentaría certa intriga, facendo que a xente especulase co que iamos facer. Como me axudou Asten, sendo el destro e eu zurdo, traballámolo en modo fotocopiadora, o que lle engadiu un aquel ao proceso».

O mural está á altura do número 31 da rúa da Coruña.

Juan Teixeira
Fotógrafo documental e xestor cultural

The following two tabs change content below.
Juan Teixeira é un fotógrafo documental con sede en Vigo. Cursou estudos de Publicidade e RRPP, pero pronto se decatou de que aquel non era o seu lugar. A través dunha serie de viaxes por Sudamérica e o sueste asiático, observou que a fotografía era unha forma de relacionarse e explorar o mundo dun modo moi persoal, coma un espectador que intenta comprender o que sucede ao seu redor. Desde entón intenta comprender ese mundo que o rodea, centrándose nas persoas e as súas relacións con outras persoas, coa sociedade, a natureza e o tempo e o lugar que a cada unha lles toca vivir.

Últimos posts de Juan Teixeira (ver todos)

X