bannerEspazoFest
Banner OSDC

Vigo, cidade de cor: Lula Goce

É a primeira artista que repite nesta sección. E faino por diversos motivos. Un deles é que a súa obra na curva de San Gregorio —da que falamos no terceiro número da revista— vai desaparecer, dado que a medianeira na que reside o mural vai ser tapada por unha nova construción. Ironicamente, unha peza que pretende reivindicar os espazos verdes e a importancia da natureza no espazo urbano desaparece baixo unha gran masa de formigón, facendo que unha das obras máis aclamadas e recoñecidas do proxecto Vigo: Cidade de cor pase á historia pasado un lustro.

As seguintes verbas de Lula Goce nunha entrevista anterior resultan agora desconcertantes: «Encántame que a arte sexa efémera. O urbanismo é cambiante como a natureza. Cando partes dese ambiente, dese ecosistema, estás a aceptar a dualidade. Ao meu parecer, estas intervencións teñen que desaparecer». Seguro que non esperaba que isto acontecese tan pronto.

Malia todo, tamén hai espazo para o optimismo. O pasado verán a artista levou a cabo unha nova peza dentro do mesmo proxecto, acadando unha acollida excepcional. Non só os veciños están encantados, senón que mesmo foi escollida pola plataforma Street Art Cities como o mellor mural mundial do mes. A obra quere homenaxear as traballadoras do mercado que está en fronte, mostrando dúas mulleres rodeadas de fauna e flora mariñas. Unha parece que lle bisba algo á outra, pero obviamente non podemos saber de que se trata. «Trátase de facer traballar un pouco ao espectador creando a dualidade de algo que ves, pero non escoitas. Cada un pode acordar o seu propio significado», asegura con orgullo a artista orixinaria de Baiona. «Trátase dunha masterpiece, é unha das mellores que pintei e gústame moito que estea na casa». E engade con sorna: «Espero que non lle planten diante un edificio».

Banner A Movidiña
O mural de Lula Goce | J. Teixeira

O mural está á altura do número 45 da avenida da Florida, perante o mercado das Travesas.

Juan Teixeira
Fotógrafo documental e xestor cultural

[Esta reportaxe pertence á revista A movida de marzo de 2021. Podes consultar o número completo neste enlace. Se queres comezar a recibir un exemplar na túa casa, apoiar o noso proxecto e participar en numerosos sorteos, faite #AMOVIDALOVER nesta ligazón. ]

The following two tabs change content below.
Juan Teixeira é un fotógrafo documental con sede en Vigo. Cursou estudos de Publicidade e RRPP, pero pronto se decatou de que aquel non era o seu lugar. A través dunha serie de viaxes por Sudamérica e o sueste asiático, observou que a fotografía era unha forma de relacionarse e explorar o mundo dun modo moi persoal, coma un espectador que intenta comprender o que sucede ao seu redor. Desde entón intenta comprender ese mundo que o rodea, centrándose nas persoas e as súas relacións con outras persoas, coa sociedade, a natureza e o tempo e o lugar que a cada unha lles toca vivir.

Últimos posts de Juan Teixeira (ver todos)

X