Tikismikis: cerámica con esmero
Tikismikis é a marca de cerámica de María Granja, artesá alacantina establecida en Vigo. Realizadas con esmero e pulcritude, no catalogo non atoparemos dúas pezas iguais, pois o proceso de creación é totalmente artesanal. A responsable tamén ofrece clases de cerámica no Taller Arterial.
María Granja é unha alacantina establecida en Vigo que hai seis anos lle deu unha oportunidade á cerámica e sentiu un amor a primeira vista. O que empezou como unha afección converteuse na súa paixón, polo que María decidiu deixar o seu traballo na hostalería para emprender en solitario e centrarse en Tikismikis, a súa marca de cerámica feita á man.
A pulcritude e o esmero son o selo persoal de María, tal como indica o nome da súa marca. Tikismikis traballa con encargos a demanda, como as vaixelas personalizadas para fogares e restaurantes. Mensaxes como «Nos tenemos a nosotras» ou a receita do típico biscoito da avoa poden decorar a nosa mesa grazas ás mans e á orixinalidade de María. No catálogo da marca non hai dúas pezas iguais, xa que o proceso de creación de cada unha delas é totalmente artesanal.
Se, ademais de investir en cerámica atemporal e única, queremos probar a crear coas nosas mans, María imparte talleres e clases mensuais en lugares da cidade como o Taller Arterial. Decora a túa mesa e o teu fogar coa arte de Tikismikis e non dubides en iniciarte na cerámica, quizais namores ti tamén!
@tikismikisartesania
Estela Gómez
Correctora literaria e redactora de contidos
Estela Gómez
Últimos posts de Estela Gómez (ver todos)
- Tikismikis: cerámica con esmero - 13 Marzo, 2025
- Norat crochet, na cabeza coas mans - 21 Febreiro, 2025
- Volve escribir a man con Panda Bohème - 18 Decembro, 2024
- Nove ideas de regalo local - 5 Decembro, 2024
- Triqueta Editora, pequenos grandes lectores - 7 Novembro, 2024