bannerViveNigran

Sesión vermú con Povarelo

Algunha vez pensamos que o vermú sería unha moda breve para despois encariñarnos con esa copiña doce e saborosa que nos empurra a quedar coas amizades ao sol sen hora de retirada. Moda ou non, hai bodegas que levan décadas elaborando este viño macerado co mesmo agarimo que o mellor tinto. É o caso de Povarelo, un vermú elaborado no Carballiño a partir dunha base vínica dunha coidada selección de viños galegos e seguindo a receita da familia Paniagua desde 1940.

O segredo de Povarelo está na calidade do viño, descartando as opcións da colleita que non dean a calidade esixida, e na paciencia. Os viños gárdanse en barricas de carballo durante 14 semanas e os botánicos macéranse por separado para lograr un equilibrio e un corpo perfecto na mistura. Atopamos notas de asente, canela, regalicia e sabugueiro no vermú roxo e azar, loureiro, eucalipto balsámico e cardamomo para aromatizar o vermú branco. Unha vez aderezado, o líquido repousa novamente; 100 días no caso do branco e 150 no do vermello.

Non é complicado atopar Povarelo, pois a marca leva a cabo moitas accións a pé de rúa colaborando sempre cos hostaleiros. Hai varios locais en Vigo nos que degustar dun grolo de Povarelo, cada espazo cunha proposta diferente:

La Quesería (Rúa de Teófilo Llorente, 12)

Comezamos a peregrinación no centro da cidade, en La Quesería; unha tapería no casco vello cuxo nome deixa claro cal é o produto estrela da casa: o queixo, un alimento do que serven ata 65 variedades en táboas, tostas, croquetas e provolone. A maioría proceden de pequenas factorías estatais. Ángeles, a dona, proponnos unha maridaxe cunha sorprendente tetilla con chourizo, un pouco de queixo azul, ou un macerado en romeu e pementa negra que contrastan co punto doce da bebida.

Las Barricas (Camiño Fontela, 130)

Aproveitando o sol, poñemos rumbo á praia. A carón da capela da Nosa Señora do Carme, en Canido, chegamos a Las Barricas; un negocio de tapas tradicionais, moi frecuentado polos veciños da zona e perfecto para xuntanzas con amigos polo tamaño abundante das racións que serven e ampla terraza interior. Pablo, que colleu os mandos do local en 2011, suxírenos acompañar o vermú roxo con produtos do mar, como unha tapa de luras ou unha torrada de polbo con tetilla e vinagreta de tomate.

Los 3 Monos (Avenida de Samil, 43)

Co solpor, poñemos encamiñámonos a un local próximo, nas inmediacións da praia de Samil, lugar perfecto para desfrutar do espectacular ceo sobre as Cíes e dun ambiente festivo. Los 3 Monos é unha das aperturas máis sonadas nas últimas semanas; un local polivalente no que se pode desde tomar un vermú ata quedar a cear.

Pero se preferimos catar o sabor de Povarelo na casa ou facer con el un regalo, na web da bodega dispoñemos de estoxos para quedar sempre con bo sabor de boca.

DATOS DE CONTACTO

Banner A Movidiña

Web:               povarelo.com

Facebook:       @Povarelo

Instagram:      @povarelo

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.
X