CAMELIAS MASCOTAS

Presumido inaugura os Concertos Secretos na Fundación Sales

Publicado o por

O dúo local de pop electrónico Presumido foi o encargado de abrir os Concertos Secretos que propoñen Regalamúsica e Cervezas Alhambra, uns espectáculos nos que a xente acude a apetecibles lugares sen saber á banda que van ver. A localización especial para esta ocasión foi a Fundación Sales, mais este non será o único espazo no que teñan lugar estes curiosos recitais a cegas.

REVISTA NOVEMBRO

Eran as 20:30 pasadas dun xoves de verán na fermosa Fundación Sales, cando dunha pantalla situada ao pé do escenario apareceron as caras de Tarci Ávila e Nacho Dafonte, membros do dúa local de pop electrónico Presumido. Nun breve vídeo, explicaron a súa historia e influencias, para que todo o público presente coñecese algo máis da banda que estaban a piques de ver. O segredo foi desvelado.

Ambos os dous apareceron relixiosamente de negro entre o público e a vexetación, e interpretaron o primeiro tema acompañados unicamente dunha tablet. Non tardaron en darlle máis intensidade ao asunto cos ritmos áxiles e potentes de Nacho á batería e as fermosas melodías vocais de Tarci, tamén á guitarra e aos teclados. Gran parte do público parecía sorprendido e complacido pola arriscada proposta deste dúo, incluso unhas nenas non deixaron de bailar nas primeiras filas durante todo o concerto. Mais, como adoita ocorrer neste tipo de eventos, hai quen pensa que a música é un mero acompañamento ás súas apaixonantes conversas cos amigos, unha sorte de fío musical de luxo, falando máis alto do debido e molestando aos que realmente estaban atendendo e gozando dun fantástico concerto.

Todo isto non descentrou a Presumido, que realizaron un concerto sobresaínte, como xa viñan de facer uns días antes na Carballeira de Caldas de Reis, no festival PortAmérica. Tocaron temas de Vendetta, o seu primeiro e único disco ata agora, e de Invierno e Primavera, dous dos EPs que formarán Cuatro Estaciones, o seu segundo longa duración. Un disco, que por certo, presentarán en Vigo o 2 de novembro en La Fábrica de Chocolate, no que promete ser un show que marcará un antes e un despois na súa breve pero intensa traxectoria. Agardamos impacientes polas dúas novas entregas destes dous rapaces e tamén polos próximos Concertos Secretos que teñan lugar na nosa cidade.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.