REVISTA ABRIL

O novo receitario de Pereira recolle o legado de Álvaro Cunqueiro

Publicado o por

Pereira Productos del Mar presenta o seu novo receitario con 12 receitas, unha para cada día do ano, inspiradas en Álvaro Cunqueiro e reformuladas polas xóvenes promesas da cociña Ana Vilar e Lluis da Riva. Pódese conseguir con calquera compra de produtos do mar nas súas tendas e consultar online.

Pereira Productos del Mar acaba de lanzar un ano máis o receitario Cociña de “Abordo”, que na súa 18ª edición rende tributo a unha destacada figura da literatura moi ligada á gastronomía: Álvaro Cunqueiro. O receitario leva por título A cociña do mar de Álvaro Cunqueiro, e nel a compañía rende tributo a un dos libros que están considerados referencia bibliográfica sobre as bases da tradición da cociña en Galicia: Cocina Gallega, publicado en 1973 e escrito por Cunqueiro xunto a Araceli Filgueira.

A botadura do receitario, que ten formato de calendario, tivo lugar no instuto vigués Álvaro Cunqueiro, fronte a un centenar de estudantes do centro que participaron como presentadoras, entrevistadora e mesmo interpretaron o Quen poidera namorarla en formato coro con frauta traveseira e piano. Tamén se atreveron a sinalar a lingua galega como a gran ausente no receitario e, pediron con humor aos responsables unha versión neste idioma.

O acto de presentación tamén contou coa presenza de César Cunqueiro, fillo do escritor, quen agradeceu a Pereira Produtos do Mar a homenaxe á figura do seu pai no medio dun emotivo discurso sobre a tradición culinaria, a infancia e a identidade. Tamén deixou claro que o seu pai foi o teórico de Cocina Gallega, pero non o autor das receitas. “El falou moitísimo de comida, pero nunca escribiu unha receita”, puntualizou. Este traballo de campo foi labor da bibliotecaria e divulgadora gastronómica Araceli Filgueira, a quen puidemos escoitar de forma telemática. Filgueira foi a encargada de “encher cuartillas coas receitas das súas amigas”, dando lugar a unha enciclopedia dos saberes culinarios máis tradicionais. Filgueira foi galardoada co Premio Picado da Cultura en 2019.

REVISTA ABRIL
César Cunqueiro | Foto: Paula Cermeño

Para La cocina del mar, contouse con dous xóvenes cociñeiros que adaptaron as receitas aos ingredientes e técnicas da cociña actual e engadindo un elementos que as fan máis atractivas para poñer na mesa de Nadal. Por unha banda, a cociñeira viguesa Ana Vilar, da Cervexaría Leria, gañadora da última edición do certame de tapas Petisquiño e candidata a Mellor cociñeira de Tapas de Galicia; e por outro, Lluis da Riva, finalista da 11ª edición do concurso televisivo MasterChef España. ambos cociñeiros elaboraron en directo dúas das receitas dos calendarios que foron ofrecidas ao alumnado.

O resultado son 12 receitas, unha para cada mes do ano, nas que a vieira, o polbo, o mexillón, a lura, o choco e o bacallau son os produtos estrela desta edición. O receitario preséntase, como vén sendo habitual, durante as datas do Nadal e convértese no detalle co que Pereira Produtos do Mar obsequia aos seus clientes. A empresa produciu 2.000 exemplares e tamén se pode descargar gratuitamente na páxina web da compañía.

12 receitas para 12 meses
 XANEIRO – Bacallau con salsa verde – Ana Vilar
 FEBREIRO – Luras recheas – Lluis da Riva
 MARZO – Mexillóns en escabeche estilo Picado – Ana Vilar
 ABRIL – Polbo estilo Illa – Lluis da Riva
 MAYO – Empanada de chocos – Ana Vilar
 XUÑO – Vieiras con xamón – Lluis da Riva
 JULIO – Ensalada de pataca e mexillóns – Ana Vilar
 AGOSTO – Polbo ao allo – Lluis da Riva
 SETEMBRO – Choquiños fritos – Ana Vilar
 OUTUBRO – Luras na súa tinta – Lluis da Riva
 NOVEMBRO – Bacallau con allada – Ana Vilar
 DECEMBRO – Vieiras ao albariño – Lluis da Riva

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.