REVISTA ABRIL

O colectivo Nova Cultura estréase cun festival de seis horas

Publicado o por

A cidade de Vigo xa conta cunha nova asociación cultural. Este sábado 4 ás 18:00 na Sala Rebullón bota a andar Nova Cultura, unha iniciativa formada por diferentes músicos locais coa idea de conseguir xuntos a forza que por separado non alcanzan. O cartel está formado por bandas como Zalomon Grass, Kings of the Beach, Youcanthide ou Karma Animal. Podes mercar aquí as entradas.

REVISTA ABRIL
David Rodríguez actuando con Zalomon Grass en Vialia | P. Vázquez

Nas inmediacións de Praza España atopamos os estudios Nova Cultura, un acolledor espazo onde diferentes artistas vigueses ensaian e gravan a súa música. A raíz desta experiencia conxunta, varios destes grupos uníronse para formar unha asociación cultural co mesmo nome coa que pretenden alcanzar obxectivos maiores e reactivar a escena musical local. “Somos grupos que levamos un lustro compartindo locais, escenarios e xiras, e con isto queremos ir máis aló do local de ensaio e do estudio de gravación. Queremos facer algo para a cidade, difundir algo máis de cultura, que falta fai”, relata David Rodríguez, un dos responsables da iniciativa e membro de Karma Animal e Zalomon Grass.

A festa de presentación terá lugar este sábado 4 de decembro na Sala Rebullón, con seis horas de música ininterrumpidas que comezarán ás 18:00. Unha das particularidades do cartel é que hai case tantas bandas como músicos: Kings of the Beach, Youcanthide, Dientes e Swic comparten integrantes, da mesma maneira que Zalomon Grass, Karma Animal e McKenzie. Unha impronta que recorda á época da Movida oitenteira, onde un músico compartía varios proxectos diferentes. Alén desta anécdota, por unha entrada de 10€ poderemos desfrutar dalgunhas das bandas locais de rock máis potentes na actualidade. Tamén haberá un mercadiño de artistas olívicos, onde atopamos a F**k this Studio, Its Ramé Crochet, Marta Knives, Suburbanrosen e máis por confirmar.

Aseguran que haberá máis eventos no futuro, sobre todo coa mirada posta nos espazos exteriores, para achegar a súa proposta á xente de a pé. Tamén buscarán traer a xente de fóra ou colaborar con máis artistas vigueses, ampliando o radio de acción desta asociación emerxente: “Sendo un estudio de música podes captar máis facilmente á xente”, opina Mauro Comesaña, outro dos integrantes da asociación e membro de Zalomon Grass ou The Soul Jacket.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.