CAMELIAS MASCOTAS

Galicia Ilusiona, o gran truco dos galegos Dani Polo e Pedro Bugarín

Publicado o por

O pasado domingo as 18:30 daba comezo no Mar de Vigo a Gran Gala Internacional de Galicia Ilusiona, un festival de maxia e ilusionismo que leva percorrengo Galicia desde o mes de agosto. Detrás desta ambiciosa iniciativa atopamos a dous magos, novos e galegos, chamados Dani Polo e Pedro Bugarín.

Dani Polo e PEdro Bugarín ao remate da gala este domingo | P. Vázquez

Galicia Ilusiona, o primeiro gran festival de maxia de Galicia, leva percorrendo todo o territorio desde o mes de agosto. É non é un dicir: actividades en máis de cen concellos e galas nas sete cidades galegas demostran que o seu obxectivo de levar a maxia a todos os rincóns da nación ía totalmente en serio. Este sábado 15 en Santiago o festival poñerá punto (esperemos que seguido) a un evento ao que acudiron máis de 50.000 persoas ao longo de máis de dous meses.

Os artífices deste gran truco son galegos e sorprendentemente novos para levar adiante semellante tarefa. O melidense Dani Polo descubriu a maxia aos sete anos grazas ao xogo de mesa Magia Borrás: “Normalmente sempre acaba nun armario, pero a min gustáronme tanto os segredos que había naquela caixa que practicaba todos os días”, lembra. A partir de aí viñeron horas e horas de práctica e tres anos na escola de maxia do Mago Rafa, o que lle permitiu converterse nun dos grandes magos do Estado, como demostra o Premio Nacional de Maxia gañado en 2017. Pola súa parte, ao coruñés Pedro Bugarín a maxia xa lle viña de familia. Seu pai, gran aficionado a este tipo de trucos, regaloulle aos catro anos o libro co que el se adentrara neste mundo do ilusionismo, e Pedro foi descifrando as ilustracións (pois case non sabía ler) para aprender eses xogos con moedas e cartas. A piques de cumprir a maioría de idade decatouse de que a xente pagaba por ver o que facía sobre o escenario, polo que decidiu dedicarse de cheo á súa gran paixón.

REVISTA NOVEMBRO

O festival de futuros talentos Compostela Máxica en 2010 foi o punto de encontro destes dous magos galegos, que a partir de aí trabaron unha grande amizade e comezaron a idear proxectos conxuntos. O máis grande foi, sen dúbida, este Galicia Ilusiona, unha ambiciosa iniciativa que non foi nada fácil de levar a bo porto: “Propuxémoslles ao Xacobeo facer o festival de maxia máis grande que se tivese feito en Galicia, e tivemos a sorte de que decidiron apostar por nós”, comenta Bugarín. A partir de aí veu o difícil: decenas de reunións, chamadas a máis de 100 concellos, pedir permisos, viaxar dun lado aou outro… “Temos o teléfono a piques de estoupar, pero estamos moi orgullosos do que estamos a facer. Superou por moito as nosas expectativas”, admite o coruñés.

Non é para menos. Este domingo o auditorio Mar de Vigo colgou o cartel de “non quedan billetes”. Non é habitual que 1500 persoas acudan, pagando entrada, a un espectáculo de maxia. O elenco de artistas, de estilos do máis variopintos, estaba formado polo coreano Hyun Joon Kim, o estadounidense Jimmy Delp, o francés Arno, a china Huang Zheng e o propio Dani Polo representando a Galicia. Polo, que deixou abraiado ao público coa súas grandes ilusións, destaca a calorosa acollida do público vigués e destaca un momento da noite no que participou a súa irmá: “Ten 11 anos e é espectadora habitual dos meus espectáculos, pero sempre me reprocha que non a saco como voluntaria. Como era unha ocasión especial, co audiotrio cheo, quixen darlle unha sorpresa e facer con ela un truco moi especial”, explica o mago, que fixo levitar á súa irmá pequena ante o abraio dos asistentes.

Dani Polo facendo levitar a súa irmá durante a gala | P. Vázquez

Ambos magos confían na continuidade de Galicia Ilusiona para o ano que vén, e nese caso o propio Bugarín non descarta actuar nunha das grandes galas. Os dous eran coñecedores, tanto como organizadores como sobre o escenario, que a maxia goza dunha grande acollida en Galicia: “É unha das comunidades nas que a maxia é considerada arte escénaica, algo que non acontece en todas. Non sei se é polas meigas, pero a maxia aquí funciona moi ben, e ademais tivemos a sorte de que o tempo nos acompañou en todos os espectáculos que fixemos na rúa. Sabemos de xente que viaxaba doutros concellos para acudir ao festival, e tamén moitos turistas e peregrinos que se interesaron pola proposta”, apostila Bugarín. Un éxito sen trampa nin cartón.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.