Cociña tradicional en Taberna Rabuda
Rabuda é unha taberna tradicional con aires renovados na que o cocido e os pratos de culler comparten carta con petiscos tradicionais de toda España e elaboracións máis actuais. Nestas datas ofrecen cocido os domingos e menús para grupos de ata dez persoas cos que festexar a mesa posta.
![](https://amovida.gal/wp-content/uploads/2022/12/Taberna-Rabuda_5.jpg)
La Marimorena era un nome moi propio para o Nadal, pero o pasado mes de maio o equipo da desaparecida taberna do Casco Vello trasladouse a doutor Cadaval, onde rexurdiu con forza baixo o nome de Rabuda. Andrea Portela, Ana Doval, e Miguel Rueda apostaron por un local máis grande e un concepto un pouco máis refinado, con servizo de mesas e maior variedade de preparacións.
A minuta conserva algúns dos pratos populares do anterior local: non podían faltar o riquísimo bocadillo de luras, a tortilla pouco feita ou o pisto, e incorpora outros como as carrilleiras de porco ibérico e o galo celta; produtos nobres cociñados durante horas e presentados con esmero. Tamén hai polbo á prancha, empanada caseira ou ensaladilla con anchoas do Cantábrico e sobremesas como a torta de chocolate, que se prepara seguindo unha receita familiar de Miguel. En resumo a carta non é moi extensa, pero conta con opcións suficientes tanto para desfrutar dun encontro informal con algo para petiscar como para organizarse unha comilona con todas as da lei.
![](https://amovida.gal/wp-content/uploads/2022/12/TabernaRabuda1.jpg)
![](https://amovida.gal/wp-content/uploads/2022/12/TabernaRabuda2.jpg)
![](https://amovida.gal/wp-content/uploads/2022/12/TabernaRabuda11.jpg)
«Agora somos un sitio máis formal», contan, rememorando os momentos en que La Marimorena se enchía de xente ata o punto de ter que servir tortillas e bocatas na beirarrúa. Malia ao refinamento, Andrea ten claro que continúan a ser unha taberna, onde «o trato próximo e a cociña caseira son as bases do negocio» e na que se pode comer en mesa alta ou mesmo na barra, ao estilo das casas de comidas tradicionais. Todo nun ambiente cálido e relaxado con elementos orixinais que nos levan aos establecementos de toda a vida e outros que evidencian que estamos nunha taberna levada por xente nova.
Algúns dos pratos cambian coas estacións do ano e co frío chega o cocido cada domingo a mediodía. O menú está pensado para dúas persoas, ten un prezo de 20€ por cabeza, e promete ser un bo festín. De primeiro, sopa. De segundo carnes de galo celta, porco e tenreira, grelo, repolo, garavanzos, fabas e chourizo. Ademais, no momento de pedilo podemos indicar se nos gusta a casquería para que inclúan un prato con rabo, pezuño e oso de Xoan. E para rematar, unha filloa.
![](https://amovida.gal/wp-content/uploads/2022/12/TabernaRabuda5.jpg)
![](https://amovida.gal/wp-content/uploads/2022/12/TabernaRabuda3.jpg)
![](https://amovida.gal/wp-content/uploads/2022/12/TabernaRabuda7.jpg)
![](https://amovida.gal/wp-content/uploads/2022/12/TabernaRabuda9.jpg)
![](https://amovida.gal/wp-content/uploads/2022/12/Taberna-Rabuda_1.jpg)
Para este Nadal,podemos elixir algo da carta ou algún dos menús grupais. Un está pensado para petiscar e o outro para comer de prato, dispoñendo ademais de opción vegana. O número mínimo de comensais para reservar un destes menús é de dúas persoas e o máximo de dez. Oscilan entre os 20 e os 32 euros e inclúen sobremesa caseira, café e groliño de licor, bebida á parte.
@tabernarabuda | rúa do Doutor Cadaval, 32 | martes a xoves, das 19:00 ás 0:00; venres, das 19:00 á 1:30 h; sábado, das 13:00 ás 16:30 e das 19:00 á 1:30 h; domingo, das 13:00 ás 16:30 e das 19:00 ás 00:00 h.
Paula Cermeño
Últimos posts de Paula Cermeño (ver todos)
- The Wild Fest, tres días de lecer na natureza, tamén para os nenos - 23 Xullo, 2024
- Se Cadra: croquetas e cachopos ao pé de Churruca - 17 Xullo, 2024
- VigoCultura avanza que Fernando Tejero, Talía Teatro ou Danny Boy-Rivera formarán parte do programa de outono - 10 Xullo, 2024
- Cinema a Pedal, dez bicis para prender un proxector - 5 Xullo, 2024
- Encordass Fiddle Fest, Orgullo, swing e concertos esta fin de semana en Vigo - 27 Xuño, 2024