CAMELIAS MASCOTAS

Cinvigo: o festival da ciencia

Publicado o por

Unha das cousas que máis sorprende dos institutos das películas estadounidenses, baile de promoción á parte, é a feira de proxectos científicos que realizan os estudantes. O volcán de soda que estoupa na cara do profesor de ciencias é un clásico que non falta nas cintas do xénero.

O sábado 22 e o domingo 23, na céntrica Porta do Sol, temos a oportunidade de ver 55 postos con proxectos científicos realizados por centros educativos galegos, a gran maioría de Vigo. Esta é unha das moitas actividades programadas para esta fin de semana do CinVigo, un grande evento que pretende achegar a ciencia a todos os públicos e converter o centro da cidade nun laboratorio. O organismo responsable deste festival é CINBIO, unha aposta da Universidade de Vigo financiada con fondos FEDER para desenvolver as investigacións nos ámbitos biomédico e biotecnolóxico cun elemento diferencial: o perfil multidisciplinar. Participan nesta feira científica uns 20 centros educativos, repartidos en tres categorías: 1.º e 2.º da ESO, 3.º e 4.º da ESO, e mais bacharelato e formación profesional; en cada unha delas hai un premio do xurado ademais dun premio popular para o total dos experimentos, no que poden votar os visitantes do evento.

Con actividades divulgativas coma esta, desde CINBIO intentan espertar vocacións e aumentar a cultura científica da sociedade, co fin de asegurar o futuro da investigación. A variedade dos proxectos —que deben explicar fenómenos físicos, químicos ou naturais— é inmensa: un sismógrafo caseiro que realiza un mapa segundo os resultados obtidos, un dron fumigador de niños de avespas asiáticas, un biorreactor para o cultivo da espirulina, un sistema de arrefriamento de bebidas utilizando placas Peltier, bioplásticos creados a través de restos biolóxicos, baterías orgánicas realizadas a base de lama…

A creación dun prototipo de coche que funciona con pilas de hidróxeno é o proxecto dun grupo de 4.º da ESO do IES Carlos Casares, coordinado por Cristina Salgado. «Este tipo de proxectos obríganos a estar continuamente actualizados. A actitude do alumnado foi moi proactiva desde o comezo, xa que a idea de participar na feira é unha gran motivación para eles», relata esta profesora de Cultura Científica; pensa que os seus pupilos «están moi concienciados coa protección do medio ambiente, que están moi interesados en combinar co uso da tecnoloxía». En definitiva, o estudantado galego deixa polo chan o volcán de soda.

Axenda de actividades

SÁBADO

12:00 Xincana
12:00 – 13:00 Maxia de peto
13:00 Espectáculo ‘Ciencieando’
13:45 Monólogos ‘Ciencia calidade’
16:00 – 18:00 Maxia de peto
18:00 – 19:00 Espectáculo ‘Ciencieando’
19:00 Actuación maxia

DOMINGO

13:00 Entrega de premios

Horarios

STANDS
Sábado 16:00 – 19:00 e 16:00 – 19:00
Domingo 11:00 – 13:00

U-CHALLENGE
Sábado 16:00 – 19:00
Domingo 11:00 – 13:00

REVISTA NOVEMBRO

OBRADOIROS
Sábado 11:00 – 14:00 e 16:00 – 19:00
Domingo 11:00 – 13:00

MÁIS INFORMACIÓN

CONSULTA A AXENDA MÁIS COMPLETA DE VIGO

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.