VIALIA
bannerPicnicSesions

Arte para tirarse dos pelos, tamén en Berlín

Publicado o por

A perruqueira Sara García, coñecida polo seu bo facer coas tesoiras e activismo no sector cultural, traslada a súa redidencia a Berlín e inicia un proxecto de sinerxia artística entre a cidade alemá e Vigo, ao tempo que mantén aberto o seu salón de peiteado, PeluqArt, na nosa cidade.

REVISTA ABRIL
Sara García no seu local de Vigo.

“Sempre envidiei o pulso cultural que ten a cidade de Berlín”, di a coñecida perruqueira. Seguramente por iso non dubidou en facer unha entrevista nunha barbería desa cidade cando unha amiga lla enviou por Instagram. Convenceuna todo da nova oferta: condicións salariais , “nada que ver co que se gaña en España”; a idea de mudarse a unha cidade que sempre lle gustara e o ambiente do seu novo espazo de traballo. “É totalmente o meu rollo: unha barbería queer que ten ademáis cafetería, espazo para programación cultural e performance e estudo de tatuaxes”.

La BarBer é unha barbería rexentada por españois que se identifican coa filosofía queer e a identidade de xénero non-binaria, algo relevante cando falamos de persoas que modelan o aspecto dos seus clientes. Pero o máis interesante da nova etapa de Sara é que non ten pensado deixar de apoiar os creadores vigueses. A primeira exposición galega que verán os berlineses será a do fotógrafo analóxico Negralente (Alexandre Folgoso). Despois ten pensado amosar artistas que xa pasaron por PeluqArt nestes anos. “Falei, por exemplo, con Lupita Hard, de quen levarei obra, pero tamén pretendo que visite o espazo e faga algunha performance. Eu pagaríalles avión e aloxamento”.

A súa mudanza non conleva o peche de PeluqArt, a perruquería que abriu hai oito anos en Rúa Couto Piñeiro. Nese mesmo local seguirán “soas ante o perigo” as súas dúas empregadas, Alba Iglesias e Tania Ballesteros, aínda que Sara predí que fará visitas periódicas para traer ata aquí todo o que vaia aprendendo no seu novo centro de traballo e continuar sendo a perruquería de vangarda que o local leva no ADN.

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.