CAMELIAS MASCOTAS

Andreia Costas: “Utilizo a ciencia ficción para falar de temas actuais sen que me leven á cadea”

Publicado o por

Este xoves 10 ás 20:00 Andreia Costas presentará o seu primeiro libro, Corazón de vaca e outras vísceras, na Libraría Cartabón. Unha obra de apenas 140 páxinas que contén numerosos relatos e infinitos universos nos que perderse. O feminismo, o ecoloxismo, a ciencia ficción e un sentido do humor un tanto escuro deambulan de maneira caótica pero ordenada polas follas do volume e pola cabeza da súa autora, coa que aproveitamos para falar.

Andreia Costas no Porriño coa estatua de Antonio Palacios | Cedida

Este xoves promete ser bastante movido para Andreia Costas. Ás 18:30 recibirá na biblioteca de Escola de Artes e Oficios o galardón como finalista do Certame Literario Exeria e, pouco despois, terá que estar ás 20:00 na Libraría Cartabón para presentar o seu primerio libro. O culpable de tantas présas é Corazón de vaca e outras vísceras (Ed. Urutau), o seu debut literario, curiosamente no eido da narrativa e non da poesía, que era o que viña cultivando ata agora a escritora.“A alma de poeta tereina sempre, faga o que faga”, comenta entre risos.

REVISTA NOVEMBRO

Estes vaivéns non sorprenden a alguén acostumada ao movemento: filla de emigrantes galegos, naceu na cidadé alemá de Stockach e desde aquelas tocou todo tipo de paus: belas artes, cinema experimental, pinche nun restaurante italiano, azafata de congresos, coidadora de anciáns… Hai case 15 anos que retornou a Galicia, decidindo que o galego cobraría unha importancia capital na súa vida e na súa obra: Anotouse nos cursos de Normalización Lingüística de Silvia Penas e Clara do Roxo para aprender galego, e ao pouco xa estaba obtendo recoñecemento en diferentes concursos polos seus relatos: “Déronme moitos azos para continuar e ver que os meus gromos literarios tiñan un oco. Foi como unha rede para coñecer a moitas artistas, intelectuais e medios de comunicación da cidade”, afirma.

En Corazón de vaca e outras vísceras atopamos moitos relatos e “mini micros”, nos que destacan o seu anticonvencionalismo e o estilo poético: “Algúns son tan curtos e cañeros coma un grolo de café italiano”, resume a creadora. O eco-feminismo impregna as súas páxinas, onde se axuda da ciencia ficción para “analizar un contexto social ou político máis amplo sen que me leven a cadea”. Máis aló da militancia, a autora bríndalle moita importancia á forma, iso si, sen caer no “cursilismo” tan habitual na poesía.

O audiovisual, que noutrora fora tan relevante na súa vida, actualmente ocupa un segundo plano nos seus proxectos. Á diferenza que en Alemaña, aquí non conta cun equipo, técnico e humano, para a creación da súas pezas experimentais. Con todo, está a desenvolver un proxecto multimedia no Instagram (@andreia_costas_100) baixo o hashtag #teño_un_corazón_de_vaca, no que diferentes persoas grávanse lendo textos do seu libro. Máis adiante, Andreia realizará un pequeno epitafio escrito a cada un deses vídeos, a partir do que cambia o relato a través de esa persoa e o que ela imaxine a nivel creativo. Unha forma de unir a todas esas persoas que, como as vacas, teñen un gran corazón.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.