O GFFF busca o cómic máis freak protagonizado polo malvado Doutor Vigo
O GFFF convoca a terceira edición do Concurso de banda deseñada, nesta ocasión baixo a temática de científicos tolos que terá todo o festival. As persoas interesadas poden visitar as bases na súa web e enviar ata dous traballos antes do 31 de xullo.
Subido á parte máis alta da torre do concello, nunha noite de tormenta, o Doutor Vigo agarda o raio que outorgará a vida á súa criatura… Este podería ser o punto de partida dunha das historias participantes no III concurso de banda deseñada impulsado polo Galician Freaky Film Festival.
Novamente o concurso poñerá a proba a creatividade dos autores e autoras convidándoos a que ambienten as súas historietas na cidade de Vigo. Ademais, para este ano no que o GFFF renderá homenaxe aos filmes de ciencia ficción protagonizados por científicos tolos, os organizadores propoñen que o protagonista das historias sexa un particular personaxe bautizado como Doutor Vigo, o cal atormenta á cidade olívica cos seus tolos experimentos.
A participación está aberta ao ámbito nacional e poderán participar todos os autores que o desexen ata o próximo 31 de xullo. As bases do concurso poden consultarse na súa web. Esta III edición do concurso contará cun gran premio de 300€, dous premios finalistas de 150€, e dous accésits que recibirán un pack de produtos cortesía de Norma Editorial. Estes premios serán outorgados por un xurado formado polos autores Carlos Portela e Xulia Pisón.
As obras gañadoras daránse a coñecer durante a #9 edition do GFFF que terá lugar no C. C. Plaza Elíptica entre os días 19 e 27 de setembro. Durante a entrega de premios presentarase o último número do fanzine do GFFF que contará con algunhas das mellores obras presentadas na convocatoria. No mesmo acto, inaugurarase unha exposición cos traballos escollidos, a cal se poderá ver de xeito exclusivo durante a semana do festival. Nesta publicación tan especial, así como na exposición, o gran público poderá desfrutar dunha chea de viñetas impregnadas polo espírito vándalo e freak da cidade de Vigo.
Paula Cermeño
Últimos posts de Paula Cermeño (ver todos)
- O GFFF busca o cómic máis freak protagonizado polo malvado Doutor Vigo - 14 Maio, 2025
- Un novo ciclo de concertos en Castrelos busca artistas - 9 Maio, 2025
- Editorial Galaxia estréase no audiolibro con tres obras infantís - 9 Maio, 2025
- Cinco motivos para ir a Play-Doc - 2 Maio, 2025
- Diesemm, impulsando Vigo a través do deporte, a gastronomía e o emprendimento - 2 Maio, 2025