REVISTA MARZO

Distopía futurista, cómic e neoviguismo no concurso de cómic do GFFF

O Galician Freaky Film Festival (GFFF) convoca un singular concurso de cómic para a súa sétima edición, que se celebra na nosa cidade os días 22, 23, 27, 28, 29 e 30 de setembro. Aproveitando o 35 aniversario do filme de animación xaponés Akira, a organización propón como temática Neo-Vigo, isto é, unha historia que transcurra nunha versión futurista e distópica da cidade olívica.

Viñeta do manga Akira

O certame de cinema e cultura underground Galician Freaky Film Festival lanza o seu primeiro concurso de banda deseñada. Tomando como referencia Neo-Tokyo, a cidade futurista na que ten lugar Akira (o filme homenaxeado este ano), os traballos presentados deberán estar ambientados en Neo-Vigo. Este Vigo ulterior, distópico e futurista deberá estar presente en todas as obras presentadas.

O prazo de recepción de traballos ábrese o 13 de abril e péchase o 3 de xullo ás 24 h. Pódense presentar obras tanto en galego como en castelán, de entre dúas e catro páxinas, en cor ou branco e negro e sen máximo de autores por obra. Este concurso creativo está restrinxido a traballos autoconclusivos e inéditos, nos que tanto a historia como os personaxes non foran publicados con anterioridade. Podes consultar as bases premendo aquí.

Proxección na última edición do GFFF | P. Cermeño

Os gañadores serán elixidos por un xurado composto por tres profesionais do mundo do cómic que elixirán os tres traballos que retraten con máis orixinalidade e calidade o Vigo do futuro. Outorgarán un primeiro premio, que recibirá 300 €, e dous finalistas, que recibirán 100 €. Ademais, tanto os tres traballos premiados como outros que a organización considere de interese serán incluídos nun libro producido polo GFFF.

Os membros do xurado especializado son Fernando Llor, guionista de cómics desde 2014 con máis de 15 traballos publicados en España, Estados Unidos, Francia e Portugal, gañador do Premio a Mejor Guionista Español en los Premios José Sanchis Grau (en 2019) e profesor de guión; Melo, dono da libraría viguesa especializada en cómic Banda Deseñada; e Alicia Jaraba, guionista e ilustradora viguesa que traballa no mercado francés, autora de Soy La Malinche e a serie Les detectives du surnaturel.

35 aniversario de Akira

Banner A Movidiña

A sétima edición do GFFF terá como filme homanaxeado Akira que este 2023 fai 35 anos. Esta película de animación chea de acción sitúase en Neo-Tokio en 2019, despois de que a capital xaponesa fose devastada pola Terceira Guerra Mundial. Un escenario postapocalíptico no que os protagonistas, unha cuadrilla de moteiros bōsōzoku, será víctima de experimentos gubernamentais para controlar as súas mentes.

A peza, baseada no cómic homónimo do propio director, Katsuhiro Ōtomo, é un filme de culto para os amantes do manga e o anime dentro e fóra de Xapón. Foi un dos primeiros referentes da animación dentro do movemento ciberpunk, unha rama da ciencia ficción que retrata sociedades distópicas cun baixo nivel de vida e unha tecnoloxía avanzada, nas que abundan as grandes corporacións e o uso de intelixencias artificiais.

CONSULTA A AXENDA MÁIS COMPLETA DE VIGO