VIALIA
REVISTA NOVEMBRO

The Wild Fest publica os horarios dos seus concertos e actividades

Publicado o por

A un mes da súa celebración, The Wild Fest dá a coñecer os horarios e programación completa da súa sexta edición, que terá lugar os días 30 e 31 de agosto e 1 de setembro en Vigo e contará con Dakidarría e Julián Maeso como cabezas de cartel. As entradas para o sábado (o venres e o domingo son de balde) están dispoñibles na súa web.

Público en The Wild Fest 2023 | Foto: Paula Cermeño

The Wild Fest chega á súa sexta edición afianzándose como un dos festivais máis singulares de Galicia. Ademais da actuación dunha ducia de bandas nacionais, o festival chama a atención por celebrar The Wild Cinema, un festival de cinema medioambiental que proxectará máis dunha vintena de curtas internacionais. O certame, que terá lugar do 30 de agosto ao 1 de setembro, celébrase no parque forestal de San Miguel de Oia (Vigo), unha contorna privilexiada coas illas Cíes como pano de fondo.

O rock é o protagonista do cartel e o ambiente tranquilo e familiar un dos seus grandes atractivos. Julián Maeso, Dakidarría, Moura e Moonshine Wagon serán o prato forte do certame na noite do sábado 31 de agosto. O encontro complétase con talleres, actividades e actuacións infantís e Orientaventura, unha xyncana de orientación polo monte, que esgota prazas en cada edición. Ao longo destes tres días tamén se poderá gozar de mercado de artesanía e zona gastro. 

O apartado musical complétase con concertos en horario vermú o sábado, con A Polémica Banda dos Bechuchos, e o domingo, con Mad Martin Trío. Ademais o festival revalida o seu apoio ás bandas galegas e emerxentes coa celebración da segunda edición do concurso de bandas Salvaxesons. O venres 30 de agosto celebrarase no festival a final do concurso, na que participan Sanny, Law, The Kelly Kelly’s, Superglú e The Broke. Un xurado decidirá o grupo gañador e outorgará un segundo e terceiro premio. Os tres primeiros recibirán 1.000, 400 e 200 euros, respectivamente.

As entradas están dispoñibles na web do festival cun prezo de 25 euros. A única xornada de pago é o sábado 31 de agosto, cando se celebrarán os concertos de Julián Maeso, Dakidarría, Moura e Moonshine Wagon, entre outros. Os nenos menores de 14 anos entran de forma gratuíta todos os días e non necesitan reservar a entrada.

Para as persoas que desexen pasar a noite, o festival habilita unha zona de descanso na que acampar por un custo extra de 5,00 € por persoa. Como na pasada edición, tamén haberá unha área reservada para furgonetas, cun custo de 10,00 € por vehículo.

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.