Os eventos culturais adiantan os seus horarios
Acorde á nova normativa que impide saír do fogar entre as 23:00 e as 6:00, moitos espazos están a adiantar a súa programación nocturna para facela compatible con esta situación. Entre eles atopamos o GFFF, Sala Ártika, Teatro Ensalle, Sala Rebullón ou o Auditorio Municipal coa programación de Vigocultura.
O tema da covid non deixa de traernos novas, case sempre negativas, ás que temos que adaptarnos para tentar mellorar a situación. A última normativa impide saír do propio fogar, agás unhas poucas excepcións, entre as 23:00 e as 6:00. Antes desta novidade, a maioría de locais xa estaban obrigados a pechar entre as 23:00 e a 1:00, polo que algúns vense obrigados a reformular a súa programación.
Comezando polo Galician Freaky Film Festival, que terá lugar do mércores ao sábado desta semana no hotel Bahía. Eran varias as sesións que tiñan programadas para as 22:00, 22:30 e mesmo ás 23:30, polo que onte anunciaron os novos horarios, cuxa sesión máis nocturna será ás 20:30. Consultade os horarios completos aquí. Lembrar tamén que dispoñen de opción online para todo aquel que desexe gozar da sesión oficial e non poida asistir, xa que o aforo é moi reducido.
En canto as salas de teatro, as obras na Ártika e no Ensalle terán lugar como moi tarde ás 20:30 ata novo aviso, agás algúns espectáculos concretos na primeira que serán ás 21:00. Esta fin de semana na Ártika temos Nueva Surrealidad do mago Carlos Tomico e Castrapo, mentres que no Ensalle estará o espectáculo de danza Bailar agora.
Seguindo coas artes escénicas, o programa municipal Vigocultura tamén adianta ás 20:30 todas as obras que terían lugar ás 21:00 no Auditorio do Concello. Este venres e sábado teremos A conquista da escola de Madhubai ás 20:30 e Viaje al centro del cuerpo humano o domingo ás 18:00.
A Sala Rebullón, practicamente a única que está a programar concertos, tamén adapta os horarios de todas as actividades previstas para outubro e novembro. De feito, víronse na obriga de adiar as actuacións de Zenzar e Os Residuos Atractivas polo Samaín, mantendo só a programación infantil con Brais das Hortas e Pakolas o sábado 31. O domingo ás 18:00 haberá teatro afeccionado coa obra A mirada das bolboretas.
É recomendable consultar as páxinas web ou redes sociais de todos estes establecementos antes de acudir a algún evento para asegurarse dos novos horarios.