CAMELIAS MASCOTAS

Me vale madre, unha taquería da nosa terra

Publicado o por

Me vale madre é a primeira taquería da vila de Cangas. Unha tapería mexicana, dirixida por xente xove, con decoración colorida e pratos moi saborosos perfectos para compartir con amigos despois dun día de praia.

Cruzamos a ría para visitar Cangas. A vila mariñeira máis que coñecida polas súas paradisíacas praias, ten tamén un animado ambiente nas rúas laberínticas. “Queremos facer comida divertida, que sempre sorprenda”, declara Antía Boubeta, a metade de Me vale madre, a primeira taquería da vila. Proba desta filosofía son os tacos de zorza con San Simón e jalapeño que acaban de aceptarlle a concurso no Campeonato de tacos de España.

Este restaurante mexicano abriu na zona vella hai dous meses co propósito de rachar coa hexemonía das tapas tradicionais que había en Cangas e ofrecer pratos novos aos seus habitantes. A carta é curta e promete sorpresas en cada comanda. Están os tacos con productos da terra, como o de polbo, o de lacón con grelos, ou o de churrasco; pero tamén teñen receitas tradicionais da gastronomía mexicana, como a cochinita pibil e a tinga, guisos especiados de porco e polo respectivamente.

REVISTA NOVEMBRO

Os nachos Me vale madre son un festín obrigatorio, no que guacamole, salsa de queixo, carne, frijoles e jalapeño coroan cada crocante bocado. Son para compartir, porque a ración é moi abundante. Só utilizan tortillas de millo nos tres apartados da carta: tacos, quesadillas e totopos, polo que son un local recomendable para celíacos e teñen moitas opcións vexetarianas e veganas, como o chile sen carne e os tacos de setas.

Non deben pasarse por alto as bebidas entre as que atopamos moitos dos refrescos e cervexas populares no país azteca. E fan micheladas, un cóctel de cervexa cun toque salgado e picante, ben chingonas e refrescantes.

Rúa Santa Baia, 8 | 986 075 267 | @mevalemadre.cangas

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.