CAMELIAS MASCOTAS

Cociña de a bordo: vieiras estilo Vigo

Publicado o por

Como cada ano, Pereira Productos del Mar volve á casa por Nadal co receitario Cocina de abordo, que neste 17.º volume homenaxea a figura da escritora e intelectual galega Emilia Pardo Bazán, nunha maridaxe perfecta entre gastronomía e literatura. O receitario leva por título La cocina del mar de Emilia Pardo Bazán, co gallo do inminente 110.º aniversario da publicación de La cocina española antigua (1913), o primeiro libro de cociña da devandita intelectual coruñesa, enmarcado no proxecto editorial Biblioteca de la Mujer, que ela mesma dirixía. Todo un  exemplo de que un volume de cociña pode achegar máis que propostas de pratos, dando pé a un documento de valor cultural con carácter histórico.

O receitario de Pereira recolle algúns dos pratos feitos a base de produtos do mar que a escritora recompilou no devandito libro, adaptados aos tempos actuais da man de dous restaurantes de relevancia en Galicia. Estas «vieiras estilo Vigo» foron reformuladas no restaurante Matices, de Carla Álvarez, en Moaña.

Ingredientes

6 vieiras coa cuncha
2 cebolas tenras
1 tomate
Perexil picado
Pan relado
Sal
Pementa
Xamón ibérico
Queixo de Arzúa
½ vaso de viño branco albariño
Pemento moído de La Vera
Aceite de oliva virxe extra  (AOVE)

REVISTA NOVEMBRO

Elaboración

Lavamos as vieiras retirando a cartilaxe branca que as adhire á cuncha e aderezamos con sal e pementa. Prequentamos o forno a 180 ºC. Mentres, picamos en dados pequenos as cebolas e o tomate e cociñamos a lume maino en aceite de oliva virxe extra. Cando a cebola estea branda, regamos con medio vaso de viño branco alvariño e deixamos que evapore. Retiramos do lume e incorporamos media culler de pemento moído. Colocamos as vieiras sobre as cunchas e colocamos sobre cada unha uns anaquiños de xamón en tiras miúdas, dous tacos de queixo e unha cullerada de cebola. Coroamos con pan relado e perexil picado. Por último, enfornamos durante 6 minutos a 180º C.

Para quen quede con gana de máis, nas tendas que o Grupo Pereira ten no número 59 da rúa da Beiramar e no número 41 da rúa da Ronda de Don Bosco regálase un receitario en forma de almanaque coa compra dos produtos do mar para o Nadal. Ademais, na web wwww.recetaspereira.es hai un apartado específico para receitarios, onde se poden descargar outras propostas coas que aproveitar do xeito máis exquisito o sabor do Atlántico. Todos a bordo!

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.