Toundra, rock contra o fascismo

O grupo de postmetal madrileño Toundra actuará en Vigo o próximo 12 de outubro, dentro da programación do Festival Underfest. Traen ao Teatro Salesianos un espectáculo con pouco percorrido, Das Cabinet des Dr. Caligari , a musicalización da película muda de Robert Wiene de 1920.

14 anos sobre os escenarios e seis discos editados son a carta de presentación de Toundra, unha banda madrileña únicamente instrumental que calquera interesado en subxéneros do rock como o stoner ou o doom ten no seu radar musical. Neste caso sorprenden asociando o seu son a un referente narrativo cunha mensaxe tan potente, tan transgresora e tan coñecida como Das Cabinet des Dr. Caligari, o filme mudo de Robert Wiene considerado a máxima perfección do expresionismo alemán.

100 anos despois a historia de Wiene segue funcionando como a formidable metáfora que tanto molestou no seu momento. O auxe do nacionalismo queda personificado na figura do hipnotizador, o doutor Caligari: autoritario, irracional, monopolista. O hipnotizado, Cesare, representa ao cidadán, cos sentidos e a vontade anuladas polo poder. “O tema era moi acorde ao 2019, cando nos sentamos a compoñer, o ano do auxe de VOX e da elección de Ayuso”, comenta Esteban Girón, guitarrista do grupo, que afirma que a mensaxe antitotalitaria da película foi o motivo que os impulsou a querer versionar a súa banda sonora.

Aínda que intetemos racionalizala en bandos, Das Cabinet des Dr. Caligari ten moito de irracional. Especialmente nas formas: puntiagudas, sombrías, sinuosas, espirais, que deixan a un preguntándose “que cojones acabo de ver”. Ao fin e ao cabo é unha película de medo. De medo ao descoñecido, a non saber que pasa. De medo pausado, do que avanza por dentro dos espectadores sen precisar de ningún susto, como a música de Toundra, que arroupa á perfección as sinistras imaxes da pantalla. “A verdade é que non somos a alegría da horta”, recoñece Girón, admitindo ese paralelismo entre o escuro e psicodélico da película e a súa banda.

O formato película máis concerto resulta especialmente convinte para os tempos que corren, aínda que o grupo artellara a proposta antes de que o virus cambiara as nosas vidas e en contra dos desexos de Girón, que o que máis lle apetecería é “que todos estivésemos de pé”. Tamén conta que o que acabou sendo un disco e unha xira comezou coa idea de facer un único concerto.

Toundra xa ten en marcha o seu próximo disco, que verá a luz en xaneiro do próximo ano. Neste próximo longo os madrileños reencontranse co seu espírito máis xoven . “Hoi moito enfado coa realidade. É un disco feito desde a raiba e o mevemento”, explica Girón, que explica que o compuxeron durante a pandemia sen saber se ían poder publicalo ou volverían a tocar ante o público. Sexa como for os madrileños non poden parar de crear, aínda que a música non sexa o único traballo de ningún dos seus catro integrantes. “Atopamos moita liberdade na inestabilidade da música e iso permítenos arriscar, convertela na nosa válvula de escape sen poñer en perigo as cousas importantes”.

The following two tabs change content below.

• Bio
• Últimos posts

Paula Cermeño

Licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado atopala en moitos dos saraos vigueses.

Últimos posts de Paula Cermeño (ver todos)

• Porto Café, café de especialidade e almorzos artesanais - 10 Abril, 2025
• Froitas Xeitosiña, tradición e frescura - 10 Abril, 2025
• Sete espazos á medida para celebracións memorables - 9 Abril, 2025
• 4 Elementos, lume elemental en Tui - 9 Abril, 2025
• The Wild Cinema convida a participar con filmes sobre natureza e sustentabilidade - 7 Abril, 2025