CAMELIAS MASCOTAS

Un paseo de película

Publicado o por

Vivimos nunha cidade cinéfila? Aínda que non sexan moitos, temos varios espazos de interese cinematográfico, como as salas dos centros comerciais Gran Vía, Praza Elíptica e Travesía; a sala con máis butacas de Galicia no cine Salesianos e mesmo o cineclub Lumière, cunha programación semanal no Auditorio Municipal. Tamén gozamos de varios certames ao longo do ano, como o Festival Primavera do Cine (FPDC), o Galician Freaky Film Festival (GFFF) ou o Festival de Cine Inclusivo de Vigo (VIIFF). A oferta está aí, mais a demanda en moitas ocasións é intermitente, dispersa ou directamente escasa. Pero tamén hai espazo para as boas novas: tras ano e medio de clausura, os Multicines Norte anunciaron en redes que volven abrir este mes. Desta forma, a cidade non perde o único espazo comercial de cine independente, que aposta polo cinema de autor e pola versión orixinal subtitulada. Tomando este pequeno oasis cinéfilo como referencia, que tal se facemos un pequeno percorrido por este grande estudio audiovisual que é a nosa cidade?

Saímos da Vía Norte e ben preto de alí temos un canellón con forma de L chamado Tercio de Afora, onde o pasado mes de outubro o director monfortino Dani de la Torre filmaba unha secuencia de Live is Life (2021), o seu último filme, que poderemos ver a partir de novembro. Outras rúas viguesas que aparecerán na película serán as da Falperra, a Quintela, a de Ricardo Mella ou a de Venezuela.

Continuamos pola rúa de Urzáiz, representada entre outras en 1967, na serie La familia Colón, dirixida polo catalán Julio Coll. Un documento histórico de gran valor, pois podemos ver o tranvía baixando polo medio da estrada co cine Odeón a babor, ou a antiga estación de tren cuxa fachada lucirá agora no complexo de Vialia. Xusto antes de chegar á Porta do Sol, viramos á esquerda para tomar un viño na taberna Eligio, práctica moi habitual do inspector Leo Caldas tanto nos libros de Domingo Villar como na adaptación cinematográfica de A praia dos afogados (Gerardo Herrero, 2015).

Paramos na Praza de Compostela para coller folgos á sombra das árbores da alameda. De facermos isto hai case un ano, igual nos coincidía cunha xornada de rodaxe de Un asunto privado, a nova serie producida por Bambú para Amazon Prime, protagonizada por Jean Reno e Aura Garrido, que logo se poderá ver na plataforma de vídeo baixo demanda. Ambientada na década dos 40, as rúas da zona vella ou a Casa Yáñez serviron como decorados de luxo para esta ficción de época.

Próxima parada: o porto. Deixamos atrás —afortunadamente— o Hotel Bahía, que albergou a rodaxe do filme Toro (Kike Maíllo, 2016), protagonizada por Mario Casas e Luís Tosar. No peirao podemos recrear a escena que aquí se rodou para Sempre Xonxa (Chano Piñeiro, 1989), primeira longametraxe galega rodada en 35 mm. Se nos botamos ao mar non é mal plan poñernos á raxeira cos ollos pechados, tal e como facían Tosar e Javier Bardem en Os luns ao sol (Fernando León de Aranoa, 2002); e se preferimos virar a estribor e adentrarnos no porto de mercancías de Guixar, igual atopamos un cadáver, como acontece na serie galego-portuguesa Auga seca (Toño López, 2020).

REVISTA NOVEMBRO

Fóra da zona centro tamén podemos achegarnos á fábrica de cerámica e porcelana Santa Clara, onde se rodou unha secuencia de acción para a serie La unidad (Dani de La Torre, 2020), facendo pasar estas nosas ruínas polas de Siria durante un conflito armado. Para rematar o roteiro, vistamos o hospital do Meixoeiro, que serviu de localización para a serie Vivir sin permiso (2018); o aeroporto de Peinador, retratado en Sete mesas de billar francés (Gracia Querejeta, 2007); ou a Facultade de Ciencias Económicas e Empresariais, convertida en instituto paraO club dos incomprendidos (Carlos Sedes, 2014). Se o tempo o permite, tamén nos podemos bañar nas augas de Bouzas, como fixo unha moi nova Marta Larralde en Lena (Gonzalo Tapia, 2001). A ruta podemos aderezala canto queiramos con curtametraxes, como 16 de decembro (Álvaro Gago, 2019) ou Marusía (Pedro Sancho, 2019) e tamén con documentais, videoclips, webseries… e se con todo iso aínda non temos dabondo, xa sabemos: sempre nos quedará París.

Pablo Vázquez
Redactor

Reportaxe patrocinada pola Xunta de Galicia, a través da Axencia Galega das Industrias Culturais (AGADIC)

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.