Zapatería González, artesáns desde 1959
Nunha sociedade extremadamente consumista, existe un pequeno grupo de profesionais dedicados a facernos pensar dúas veces antes de botar calquer obxecto ao lixo e comprar outro novo. Javer, Valeria e Claudio, as persoas detrás da Zapatería González pertencen a ese selecto grupo que poderíamos catalogar de resistencia e desde o seu negocio no número 58 da rúa México reivindican o traballo artesán, o consumo pausado e o comercio de barrio.
![](https://amovida.gal/wp-content/uploads/2022/11/Zapateiro.jpg)
Calzado, bolsos, maletas ou artigos de marroquinería son algúns dos obxectos que se arranxan nun establecemento no que nos recibe Javier, un dos rexentes dun negocio inaugurado en 1959, do que tomou a remuda canda dous socios en marzo de 2021. Trátase da Zapatería González, un negocio tradicional coa capacidade de aumentar a vida útil de obxectos cotiás de coiro, madeira, materiais sintéticos ou metal.
Detrás, no obradoiro, están Valeria e Cláudio, apaixonados por traballar o coiro e moi comprometidos coa idea de lle dar unha segunda oportunidade aos obxectos antes de dalos por perdidos. “Non importa se son zapatos de marca ou de chilindrada, aquí dámoslles a mesma importancia”, explica Valeria que, ademais de arranxos, tamén confecciona pezas de coiro por encargo, como bolsos, carteiras ou cintos, pois xa se dedicaba á artesanía antes de emprender este proxecto.
![](https://amovida.gal/wp-content/uploads/2022/11/Zapateiro_10.jpg)
![](https://amovida.gal/wp-content/uploads/2022/11/Zapateiro_14.jpg)
![](https://amovida.gal/wp-content/uploads/2022/11/Zapateiro_15.jpg)
![](https://amovida.gal/wp-content/uploads/2022/11/Zapateiro_12.jpg)
![](https://amovida.gal/wp-content/uploads/2022/11/Zapateiro_13.jpg)
![](https://amovida.gal/wp-content/uploads/2022/11/Zapateiro_9.jpg)
Cada vez son menos os negocios dedicados a remendar, e o principal motivo é a diferenza de custo entre a man de obra aquí e nos países de fabricación dos produtos que consumimos. Aínda así, Javier insiste en que debemos preguntar antes de tirar: “Moita xente leva unha sorpresa ao comprobar que compensa arranxar e empeza a facelo con máis obxectos”, explica en relación á pouca información que normalmente temos sobre o custo da reparación.
Estamos nunha etapa aciaga para os pequenos comerciantes e, asemade, nun momento de reivindicación do consabido valor que albergan: confianza, consolidación de emprego, dinamización dos barrios, identidade e proximidade, un valor que reivindican desde González. “Moitas veces esperamos a que peche a tenda da nosa rúa para lamentarnos de non ter pasado máis por alí”, lamenta Javier, que se mostra orgulloso da rede de compañeiros e amigos que teñen creada no barrio. ” Se nós non temos a capacidade para axudar a un cliente, sempre recomendamos a alguén que poida facelo”, sentencia.
![](https://amovida.gal/wp-content/uploads/2022/11/Zapateiro_2.jpg)
![](https://amovida.gal/wp-content/uploads/2022/11/Zapateiro_5.jpg)
![](https://amovida.gal/wp-content/uploads/2022/11/Zapateiro_8.jpg)
A experiencia e habilidades deste trío de remendóns lévaos a realizar traballos xa case extintos: forrado de zapatos, para o que é preciso desmontalos e montalos por completo; recorte de punteiras, para nos librar de modas caducas; ou arranxo de pezas metálicas, como as fibelas dos cintos. Neste momento, no centro do obradoiro hai unha cadeira de case un século de historia, esperando a ser engalanada con novos repousabrazos de coiro. Un trono disposto a ser gobernado polos mellores artesáns.
Podes contactar con eles no teléfono 986 471 627 ou achegándote á rúa México, 58 de luns a venres de 9:30 a 13:30 y de 16:30 a 20:00 e os sábados en horario de mañá.
Paula Cermeño
Últimos posts de Paula Cermeño (ver todos)
- The Wild Fest, tres días de lecer na natureza, tamén para os nenos - 23 Xullo, 2024
- Se Cadra: croquetas e cachopos ao pé de Churruca - 17 Xullo, 2024
- VigoCultura avanza que Fernando Tejero, Talía Teatro ou Danny Boy-Rivera formarán parte do programa de outono - 10 Xullo, 2024
- Cinema a Pedal, dez bicis para prender un proxector - 5 Xullo, 2024
- Encordass Fiddle Fest, Orgullo, swing e concertos esta fin de semana en Vigo - 27 Xuño, 2024