Xacobeo Importa traerá a Christian Löffler á Sala Mondo
O ciclo de concertos Galicia Importa regresa na súa 10ª edición e coincidindo co Xacobeo 21-22 recupera o nome de Xacobeo Importa, do mesmo xeito que no último Ano Santo 2010, para ofrecer concertos internacionais repartidos por distintas cidades da xeografía galega. A parada en Vigo será o 25 de novembro, na Sala Mondo, coa actuación de Christian Löffler.
Este domingo 7 de novembro arrinca a programación Xacobeo Importa co concerto de Efterklang en Santiago de Compostela. O 9 de novembro a solista de jazz Cécile McLorin Salvant chega ao Auditorio Afundación de Pontevedra. O 25 de novembro o protagonista será o alemán Christian Löffler, na Sala Mondo de Vigo e ata o Teatro Principal de Ourense chegará a banda americana Cracker, co seu concerto programado para o 4 de decembro.
Christian Löffler está considerado un dos produtores de techno máis sutiles do mundo, experto en crear paisaxes e sensacións a través dos sons repetitivos. Na súa música mestura euforia e melancolía e logra evocar as paraxes inhóspitos do Mar Báltico, esa xeografía do nordeste xermano onde creceu. Presentará os seus dous últimos discos, Lys (2020) e Parallels (2021), este último unha homenaxe experimental e electrónica a Beethoven
O Ciclo Galicia Importa naceu en 2008 co obxectivo de achegar a Galicia recoñecidos artistas internacionais referentes nos seus respectivos estilos e poñer a nosa comunidade dentro do circuíto de xiras internacionais. Nos seus anos de traxectoria achegou a Galicia a auténticas lendas da música contemporánea como Alice Cooper, Joan Baez, Lucinda Williams, Ronnie Spector, Steve Vai, Ron Carter ou Mavis Stapples.
As entradas para todos os concertos están xa dispoñibles en Ataquilla.
Paula Cermeño
Últimos posts de Paula Cermeño (ver todos)
- Ziggy Alberts, Luis Zahera e Oswaldo Digón completan o cartel do Terraceo - 23 Abril, 2024
- ‘Perder a lingua’, de Eva Comesaña - 23 Abril, 2024
- Trinidad Vázquez (profesora): “Cando pasan os anos, o que recordas da túa vida escolar é aquelo que saíu da rutina” - 18 Abril, 2024
- Arte por saúde, a proposta solidaria da ONG Tierra de Hombres - 11 Abril, 2024
- O Museo do Mar achéganos ao Oroza máis persoal a través da exposición ‘En el norte hai un mar…’ - 29 Decembro, 2023