CAMELIAS MASCOTAS

Volve 10 anos despois a volta a Galicia ‘700 camisetas contra a leucemia’

Publicado o por

No 2009 David Gil, presidente de FRANGIL e promotor da marcha solidaria 700 camisetas contra a leucemia, percorreu en 10 días os 500 quilómetros que separaban os sete principais hospitais de Galicia. 10 anos despois quere repetir este fito, esta vez acompañado por máis xente para ir relevándose e en menos días.

REVISTA NOVEMBRO
  • David Gil na marcha de Galicia no 2009
  • David Gil, de costas no centro da imaxe, na última marcha organizada a Pontevedra

Do 19 ao 22 de setembro, David Gil e todas as persoas que o acompañan percorrerán as sete principais cidades galegas correndo, repartindo 100 camisetas nos hospitais de cada localidade. Un total de máis de 500 quilómetros en catro días, nos que os corredores iranse turnando cada 10kms. “As persoas que participan nesta volta a Galicia tanto na organización como os propios corredores teñen distintas vinculacións coa leucemia ou coas enfermidades do sangue, e con isto pretendemos facernos visibles, falar en nome de todas esas persoas que esperan pacientes por unha medula ósea compatible que lles permita vivir e/ou vivir mellor”, comenta David, organizador deste evento e presidente da asociación FRANGIL.

Cada unha desas camisetas representa “unha oportunidade para a curación da leucemia e do mesmo xeito que no ano 2009, nós regalamos 700 oportunidades, xa que terán o seu destino nos próximos 700 rexistros na nosa comunidade”. E como podemos tomar parte e axudar nesta iniciativa? David explica que “calquera persoa pode achegar o seu granito de area informándose de como pode formar parte do rexistro de doantes de medula ósea non emparentados (REDMO). Facendo algunha achega económica a algún dos proxectos de investigación que nestes momentos están a desenvolverse en Galicia e en España e máis concretamente a esta iniciativa, non podo negar que calquera achega que se puidese facer na nosa fila cero, sería moi de agradecer“.

Ademais da visbilización, David márcase un obxectivo: “a miña intención é a de conseguir un mínimo de 70 rexistros só coa información dos nosos corredores, ou sexa, un 10% das camisetas que entregaremos nos hospitais”. Mais esta non é un tarefa sinxela, xa que polo de agora só levan financiado un terzo do presuposto: “o reto vaise facer de todos os xeitos; só necesitamos pernas, corazón e un sorriso para alcanzar a nosa meta”, finaliza o organizador.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.