Variopinto, tecido feminino
Hai xa dez anos que Minia Banet aprendeu a tecer con gancho e a expoñer algunhas das súas pezas a través das redes sociais. O que empezou como unha afección, acabou levándoa a aprender bordado e converteuse nun dos motores da súa vida baixo o nome dunha marca persoal: Variopinto.
Minia é fotógrafa, bordadora, amante da artesanía e cinéfila. Que facer con tal combinación? Ela decidiu conxugar todo iso bordando sobre bastidores retratos das súas referentes cinematográficas e vitais. En Variopinto atopamos bordados con ídolos femininos procedentes de diversas áreas da cultura: actrices como Marilyn Monroe, escritoras como Rosalía de Castro, ou fotógrafas como Vivian Maier, entre moitísimas outras. De querer formar parte e contribuír a ampliar o tecido feminino a través desta técnica, podémonos poñer mans á obra nalgún dos obradoiros que esta marca ofrece a través de Internet ou de xeito presencial en diferentes lugares de Galicia.
Feitas á man, estas pezas únicas están deseñadas para decorar paredes e andeis das nosas casas para lles dar un toque vintage. Ademais, son unha boa idea para facer un regalo orixinal. Para mercar algún dos bordados de Minia, pódese visitar a web studiovariopinto.com ou visitar a tenda Vaidhé (rúa do Carral, 7) e botarlle unha ollada ás posibilidades que ofrece esta técnica de artesanía mixta que une tradición e vangarda. As mulleres bordámolo!
Estela Gómez
Correctora literaria e redactora de contidos
Estela Gómez
Últimos posts de Estela Gómez (ver todos)
- Dos Nudos: Catro mans, dous nós - 16 Abril, 2026
- A forza do delicado: as xoias de vidro de Toda Frágil - 11 Marzo, 2026
- Xoias para un ‘look’ total - 6 Febreiro, 2026
- Dez ideas de regalo local para este Nadal - 10 Decembro, 2025
- Crea pezas únicas ou dálle unha segunda vida a calquera roupa con Felicetta Gualtieri - 10 Decembro, 2025